Aitlang ram la lêt turin Mizoram sorkar ngen

ZPM Ṭhalai president Malsawmzuala Ralte chuan nimin khan thuchah (statement) tichhuakin, Vairengte Aitlang hmuna ram/huan neitu, Assam laka chánte tan hma la thuai turin Mizoram sorkar a ngen.

Malsawmzuala Ralte chuan, Himanta Biswa Sarma kaihhruai Assam sorkar chu Mizoram chhûngah a che nasa hle tih sawiin, "Assam sorkar hian tun hmaa thil thleng ngai lo, Vairengte auto-rickshaw stand-a Mizoram police camp hial tharum hmanga min rawn hnehchhuh bakah, Aitláng rama huan lo ram nei Mizo chhungkaw 18 chu an ram a lo chhuhsak tawh bawk a ni," a ti.

ZPM Ṭhalai President chuan, Vairengte auto-rickshaw stand-a Assam sorkarin a police-te hmanga Mizoram police camp a chhuhsak chu Vairengte mipui leh Mizoram police-te'n an chhuhsak let leh nghal laiin, Aitláng hmuna Assam sorkarin tun hnaia Mizoram a luah takte chu chhuhsak a la ni lo a, ram neitu Mizote rilru na takin an awm mek tih a tarlang.

Vairengte dáia Mizoram police camp lak lêt leh Assam-in NH-306 kawngpui hun eng emaw chen an dan hnua hawn a nih leh tâk vanga lawmna leh hlimna avangin Aitlánga Assam laka ram chántute chu Mizoram sorkar leh mipuiin an theihnghilh mai a hlauh thu sawiin Malsawmzuala chuan, "Aitlánga kan ram hi kan lâk lêt leh hma loh chuan hnehna famkim chang tawh ang maia awm hi a dik lo ang," a ti.

Malsawmzuala Ralte chuan, "Assam lakah Mizote chènna huan leh ram kan chán mek a ni tih hi Mizoram sorkar hian hria se, a thangtlàwm thlâk hle bawk a ni tih hre tel ngei turin sorkar thuneitute ka chah a ni," a ti a; Assam sorkarin Aitlang rama chem loa lu a lâksakte harsatna chu mutmawh hnàrmawha nei tur leh harsatna sutkiansak thuai turin Mizoram sorkar a ngen a ni.