Electric bill sang bikte ennawn turin MCU-in sorkar an ngen

Kawlphetha hman man tihsan chungchangah Mizoram Consumers' Union (MCU) office bearer-te chuan nimin khan Power & Electricity department hotute an kawm a; electric bill thara sang lutukte chu ennawn vek turin an ngen.

MCU hruaitute hi PE department-a engineer-in-chief Lalduhzuala Sailo leh officer dang palite nen an inkâwm a; chumi hnuah MCU chuan press release an siam nghal a ni.

MCU chuan, power tariff chu April 2021 aṭangin 23.7%-a tihsan ni mah se, bill thar ṭhenkhat chu dik tawk lo a awm ngeia an hriat thu an tarlang a, "Bill sang hi ennawn vek turin kan ngen. Hetia sawi a nih hnua bill sang leh dik lo nia hriaa lungawi lote chuan mahni SDO hnenah August 17, 2021 aia tlai loah ziaka thlen vek ni se, complaint chinfel hma chu bill pek loh tur a ni," an ti.

Electric bill-a lungawi lohna neite zualkona chu enfelpui turin PE department SDO tinte hriattir an ni tawh tih sawiin MCU chuan, "Heta la lungawi lote chuan Electricity Forum, E-in-C hnenah ziaka thlen tur a ni," an ti a; chumi copy chu MCU pisaa pe tel turin an chah bawk.

MCU tarlan danin, tun thla hnih/thum chhunga electric bill a san chhan ber chu sorkarin tariff thar a hman vang a ni a; consumer-te chu an bill-a kawlphetha hman zat inziak leh meter-a unit chhuak zat enmil nachang hre turin an chah a ni.