Ramri hrûl boruak muanawmna atan District hotute an pawimawh - Governor

Governor Brig.(Rtd) BD Mishra chuan nimin khan Raj Bhavan-ah Home department, Health department leh PWD hotute a kâwm a, department aiawhte'n an hmalakna pawimawh zualte an hrilh. Larsap chuan, ramri hrûl boruak muanawm a awm theihna turin ramri hrûl district hotute an pawimawh hmasak thu a sawi.

Buaina chinfelna turin silai hmet puak tawh miah loa boruak muanawm tak nen inbiakna zawh a ṭul hmasa tih sawiin BD Mishra chuan, "Thuneitu sang zawk - state level anga ramri buai chingfel tura indàwrna atan ramri hrûla district-ahte boruak muanawm a awm ngei a ṭul hmasa. Ramri hrûl boruak muanawm siam tur chuan ramri hrûl district hotu DC leh SP an pawimawh hmasa ber a ni," a ti.

Governor chuan, ramri hrûla district thuneitute chu state pahnih karah boruak muanawm a awm theih nan an inṭhian ṭhat a ngai tih sawiin, "Ni tin emaw, a theih anga zingin an inbiak a, chanchin an inhrilh reng a ṭul," a ti a; Forest official-te pawhin police hruaia ramri buai lai an tlawh loh a ngaih thu a sawi.

Brig. BD Mishra chuan, ramri buaina avanga Mizoram mamawh lâk luhna kawngpui NH-306 dan a ni ṭhin chu thil ṭha lo tak, mihringpuite dikna leh chanvo hnualsuatna a nih thu a sawi a, "He harsatna chinfel dan awlsam ber chu Kaladan Multi Modal Transit Transport Project (KMMTTP) a rang thei ang bera siam zawh a ni," a ti.

Governor chuan, PWD hotute chu KMMTTP chak zawka thawk tur leh project thawh­na tur sum táng mek pawh nawr chhuah a nih theih nan sorkar laipui nawr turin a chah a; a ṭul chuan Governor a nihna ang pawhin sorkar laipui dàwr a inhuam thu a hrilh.

Tunah chuan NH-306 chu Mizoram nunna hnár a ni rih tih sawiin Larsap chuan, "KMMTTP siam zawh a nih hunah chuan Mizoram tan ni tin mamawh leh bungraw châwk luhna kawngpui zau zawk leh awlsam zawk a awm dawn. He kawngpui hi Mizoram tan mai ni lo, India hmarchhak leh India ram pum tana project pawimawh a ni," a ti.

Governor BD Mishra chuan, Covid-19 donaah Mizoram sorkar a che ṭha tâwka a hriat thu a sawi a; hripui léng tàwp hun tur hriat a nih loh avangin Health department chu damlo khum siam belh, Covid-19 veite enkawlna bik damdawi-in siam belh, oxygen a tam thei ang ber khâwl, ventilator tam zawk neih belh, thawktu lak belh leh vaccine chak zawka pek kawngahte thâ thlah lo turin a chah.

Inkawmnaah hian Home secretary Vanlal­ngaihsaka, Health secretary R Lalramnghaka leh PWD chief engineer (Highways) Lalruatkima ten Governor chu a hriat duhte an hrilhfiah a ni.