Naupang 27 khuaikhemtu Zirtirtu kum 15 chhung táng tura tih a ni

Kum 2014-a Saichal khaw naupang 27 vel khuai­­khemtu H Lalhming­mawia (39), Saichal chu District Court, Champhai Fast Track Court chuan kum 15 chhung lung-ina táng tur leh Rs. 8,000 chawi turin a hrem. Hemi chung changah hian Court chuan August 11, 2021 khan judge­ment a tichhuak.

H Lalhmingmawia hi Saichal P/S-a a ngheta thawk a ni lo a; kum 2008-ah Education Volunteer teacher angin a thawk ṭan a, EV teacher term a tawp hnu, kum 2012 aṭang VEC sum hmangin rawih chhunzawm a ni. Kum 2011 aṭanga 2014 inkar vel khan naupang 27 aia tlem lo, kum 8-12 inkarte chu a khuaikhem ṭhina puh a ni.

November 8, 2014-a Vanglaini palaiin Saichal a tlawhnaah khaw mite chuan, naupangte chuan an chunga an zirtirtu chêt dan chu an sawi chhuak ngam lo ṭhin. Naupangte chuan an chunga H Lal­hming­mawia chet dan chu an sawiho ve ṭhin a, an sawiho thâwm chu pui­tlingin an hriat hnuah an zawtfiah a, naupangte pawhin an sawi chhuak ta a ni.

Saichal P/S-a zirtir­tu pension tawh pakhat chuan, H Lalhming­mawi­a'n naupangte a khuai­khem dan an zir­chian­­naah, naupang 32 a khawih hman nia an hriat thu a sawi a; police-te erawh chuan naupang 27 a khuaikhem niin an sawi a ni.

Nu leh pa ṭhenkhat sawi danin, H Lalhmingmawia chuan zirlai naupang, an zirlai thiam lote chu a bàn tlaitir ṭhin a, chutah chuan naupangte chu a khuaikhem ṭhin.

Kum 2014 November thla tìr lamah Ngopa police-te'n an man a, Ngopaa an lâk hnuah Champhaiah hruai leh a ni.