Mizoramah thisen pek a tlahniam

Covid-19 léng leh total lockdown avangin Mizoramah, a bikin Aizawlah thisen pek a tlahniam a, a thlawna pek (voluntary donation) leh pawl anga thisen pek huaihawt (donation camp) pawh a tlahniam. Aizawla blood bank hrang hrangte chuan thisen neih khawl sa an nei tlem tlangpui.

Vanglaini palai zawhna chhángin Civil Hospital, Aizawla Model Blood Bank hotute chuan, thisen lâk khâwl sa an nei tam lo a, replacement donation (pek bik nei leh rulhna) a tam thu an sawi a; blood donation camp a tlem a, thisen petu tur inzawntir a ngai fo tih an sawi a ni.

Aizawl Civil Hospital Blood Bank hotute sawi danin, Aizawl khawpuiah kumina lockdown kalpui hnuah donation camp hi May thla chhungin vawi li, June-ah vawi nga leh July thlaah vawi thum chiah an nei a, hun dang ngaihtuahin a tlem hle a ni.

Synod Hospital Blood Bank hotute pawhin thisen neih khâwl sa an nei mang lo a, loh theih lohin replacement donation tih a ngaih ṭhin thu an sawi.

May thla khan donation camp vawi hnih, June leh July thlaah vawi khat ve ve an nei tih sawiin, "Lockdown chhung khan donation camp kan nei tlem khawp mai; August thla erawh chu kan neih nual hmel," an ti.

ZMC Blood Bank-ah pawh thisen khawl sa nei tam lo mah se, thisen pek ngai an tam loh avangin an la indaih theih thu an sawi a; kumin May, June leh July thla chhungin thla khatah blood donation camp vawi khat ṭheuh an nei.

July-ah khan Civil Hospital, Aizawl Blood Bank-in donation camp vawi thum an neih aṭangin thisen unit 132 an hmu a; Synod Hospital-in donation camp vawi khat neiin thisen unit 39 chiah an hmu bawk.

Association for Voluntary Blood Donation (AVBD) hruaitute sawi danin, sorkar kum kal mek (2021-22) chhunga first quarter, April-June chhung khan Mizoram pumah thisen pek unit 5,372 zinga 4,754 (88.5%) chu voluntary donation a ni a; voluntary donation percentage hian kum hmasa April-June chhunga voluntary donation 93% chu a pha lo hle.

AVBD president C Lalnunnema chuan, tun hnaia thisen pek a tlâkhniam chhan ber nia lang chu - Covid-19 léng leh inkhàrkhip vang te, ṭhalai rual (kum 18-44 inkar)-te'n Covid-19 vaccine an lâk lai a nih vang te, zirna-inte khàr a nih vangte a nih thu a sawi a, "Zirna-in, college zirlaite hi thisen petu pawimawh takte an ni a, NSS lamin ṭan la viau mah se, college an kal theih loh avangin thisen pe tura inkoh khawm a harsa. Hripui léng avangin donation camp neih a buaithlak a, chuvangin mimala thisen pek kan uar lehzual a ṭul hle a ni," a ti.

AVBD hruaitute chuan, Covid-19 a léng chung pawh hian thisen pe duh an awm chuan harsatna a awm loh thu an sawi a; Covid vaccine late tan ni 14 hnuah thisen pek theih a nih thu leh Covid-19 positive-te tan pawh negative result an neih aṭanga ni 14 hnuah pek theih a nih thu an sawi bawk.