PMGSY I&II tihtawp a ni dawn Sorkarin sum a pûksak lui - MPCC

Mizoram Pradesh Congress Committee (MPCC) hruaitute chuan nimin khan Aizawl Press Club-ah thuthar thehdarhtute an kâwm a; Mizoram sorkarin PMGSY sum a pûksak luih avangin contractor-te an mangang hle niin an sawi.

MPCC general secre­tary John Siamkunga chuan, sumah Mizoram sorkar a harsa hle nia sawiin, "CSS hnuaia project leh scheme ṭha tak tak, ram leh hnam tana chenfâkawm tak tak, ram rotling siamna atana hman tur sum a pûk kual nasa hle. Chuvang chuan utilisation certifcate pek theih loh a tam a, central aṭanga sum lo kal tur a táng vek a ni ber. Chu'ng zinga pakhat chu PMGSY hna a ni," a ti.

PMGSY contractor-te an mangang hle tih sawiin John Siamkunga chuan, "Ram rotling siamna a nih avangin sorkar hian a ngaihven a, central aṭanga sanction lo kal pe chhuak vat turin kan phût. Central-in PMGSY phase I&II kawngte hi Independence kum 75-na lawm hma ngeia hawn vek an duh a ni," a ti a, March 31, 2022 hma zawh vek turin thupek chhuah a nih thu a sawi.

MPCC GS chuan, March 31, 2022 hmaa hna thawh zawh hman a nih loh chuan thawh chin sum pek mai tur a nih thu sawiin, "Hna zawh loh a awm pawhin a kalsan dawn tho a, state sorkarin state suma a chhunzawm a ngai tawh dawn tihna a ni. State sorkarin a chhunzawm thei lo a nih chuan hluihlâwn mai a ngai dawn," a ti.

John Siamkunga chuan, PMGSY hnuaia contractor-te chu an hna zo vat tura vauna pek an nih thu sawiin, "An mangang a, an hnathawh tawh running bill emaw, final bill emaw pawh la thei lo hlir an ni. State sorkarin hian PMGSY sum central aṭanga lo kalte chu a pûksak lui a, a pe leh thei mai si lo. Contractor tan chauh ni lo ram pum tan a manganthlak hle. Sum tel loin hna a thawh theih si loh," a ti.

Sports minister Robert Romawia Royte-in Hnahthial Field no. 2-a phûl lem phah mek a en ṭumin project tàwp hnu an ti thar niin a sawi tih tarlangin John Siamkunga chuan, "He project hi thawh lai reng, tihtawp lailâwk a ni lo. Thu dik lo sawi zeuh chìn hi ram hruaitu tan chîn loh a ṭha," a ti a; Hnahthiala phûl lem phahna chu Congress sorkar laia NEC hnuaia 100% funding-a an hmuh a nih thu a sawi.

MPCC GS chuan, phûl lem phah chuan Covid-19 dona atan a ṭha, kan siam zel ang tiin Robert Romawia'n a sawi nia sawiin, "Damdawi lam mithiam, scientist ropui leh doctor thiam tak takte pawhin an la hriat loh a nih hmel a, a mak hle a ni," a ti.

Phûl lem phah chu Covid-19 dona atana sum hnár ṭha tih a nih pawhin a dik zîktluak lo nia sawiin Siamkunga chuan, "CSS hnuaia hnathawktute'n bill an lakin sorkarah GST 12% an chhûng lut a, chu chu state leh central-in 50-50 in an insem. Mahse, CSS pawisa kan dawn chu kan do lêtna atan state sorkarin 10% a thawh ve leh tho a ngai," a ti a, CSS atan state-in 4% a pek belh zawk a ngaih thu a sawi.

MPCC spokesperson Dr Lallianchhunga chuan, Mizoram sorkarin hripui leh RT-PCR a do kawp nia sawiin, "Hripui donaah chuan mipuiin sorkar kan thláwp a, keini pawhin a nazawngin sorkar kan bei ngai lo. RT-PCR leh zel a do hi chu ṭha kan ti lo, Lungleiah bun a nih lohna atan an ukil ṭha ber ber an tír a ni. Phûl lem hmanga Covid-19 do ai chuan keini chuan health infrastructure leh thawktu tihchangtlun a ṭha kan ti," a ti.