Covid-19 damdawi leh hmanrua nei ngah tawk

Nimin khan Health minister Dr R Lalthangliana hoin Secretariat conference hall-ah sorkar official-te'n Covid-19 donaa hmalak dan an thlirho a; hripui dona atana mamawh hmanrua leh damdawi dinhmun a ṭhat thu tarlan a ni.

Ṭhutkhawma tarlan danin, Rapid Antigen Test (RAT) hmanrua chu tuna hman dan anga chhûtin chawlhkar hnih daih a la awm a, 3,00,000 dang lei belh tum mek a ni. Viral transport medium (VTM) chu thla nga daih a la awm.

ICMR-in RT-PCR test kit 20,000 a thlàwna an rawn pek chu nikum lama siam a nih vangin a hlui deuh tawh a, ZMC RT-PCR lab.-ah hman theih a nih loh avangin Health Minister hmalaknain ICMR-ah hriattir a ni a, a dang a rawn thleng dawn a ni.

Delhi aṭangin RNA extraction kit 20,000 a rawng thlen leh dawn a, Guwahati aṭangin 1,000 thleng mai tur a awm bawk. Hengte avang hian mumal takin RT-PCR test kalpui leh thuai beisei a ni. PPE pawh Mizoramah ṭhui a nih avangin a tam tâwk a, mamawh dang - hmai tuamna, sanitiser, sodium hypochloride leh thil dangte pawh a awm ṭha bawk.

State Referral Hospital (ZMC)-ah khum 25 awmna NICU (naupang enkawlna), kum 10 awmna PICU leh khum 10 awmna HDU-te peih thawkhat a ni tawh a; oxygen outlet siam a la ngai a, phai lam aṭangin technician-te'n an rawn bun dawn. Oxygen pipeline chu LG Electronics-in an tum a ni.

Covid-19 vei zinga negative tawh, ventilator la mamawh chhunzawmte Aizawl Civil Hospital-a enkawlna tur ICU khum 10 awmna peih a ni dawn hnai a; khum 40 awmna Kulikawn Hospital DCHC pawh luah theih tura peih tawh niin, damlo admit theih a ni tawh. Mualpuia MSSC Hostel, DCHC atana hman tur pawh peih thuai beisei a ni bawk.