Governor-in thawhpuiah mipui a sáwm

Governor Brig. BD Mishra (Rtd) chuan Mizoram Governor ni tura August 11, Nilainia thu a tiam hnuah thuchah a tichhuak a; mipui chungah lawmthu sawiin, Mizoram hmasawnna leh mipui hamṭhatna tura thawhpuiah mi tin a sáwm.

Larsap Brig. BD Mishra chuan Mizoram mipui rawngbawl tura hun remchang siamsak a ni chu lawmawm a tih thu a tarlang a; Mizoram chu state tê ni mah se, siamtuin malsawmna hai chhuah tur tam tak a dah tih sawiin, "Ram mipuite hi inpawh tlang leh inthurual tak, remna leh muanna ngainá an ni," a ti.

Governor chuan, "He ramin theihna tam tak a neihte hai chhuak turin mipui thlan ram hruaitu te, sorkar hnathawk te, loneitu te, zirtirtu te, thil siamnaa thawktu te, ram inrêlbàwlna kengkawhtute kan pawimawh vek a ni," a ti a; ram hmasawnna atana thawk turin khawi hmunah pawh, eng hunah pawh a inpeih reng tih a sawi.

Brig. BD Mishra chuan, "Mizoram mipuite'n thinlung inhawng taka min lo lawm hian min tihlimin a, in tana theihtawp chhuah turin chona thar min pe a ni," a ti bawk.