KHAWTHLIR

Sa leh thlai man Zâwm turin hriattir
Sa leh thlai man bithliahtu Prize Fixation Committee member-te nimina an chairman Dr Lalhriatzuali Ralte, Aizawl DC hoa a pisaa ṭhukhawm chuan, lockdown thlahdul ni mah se, sa leh thlai man an bithliah tawh chu hman chhunzawm zel ni se an ti a, zâwm ṭheuh turin mipui an hriattir. Prize Fixation Committee hnuaia din Inspection & Monitoring Team-te chu sumdawng leh thil zuarte'n sorkar thu an zawm leh zawm loh endika kal kual tura tih an ni.

PM-in kâwm
Prime minister Narendra Modi chuan nimin khan DAY-NRLM hnuaia self help group-te a kâwm a, Rural Development minister Lalruatkima, RD secretary R Zarzosanga, MzSRLM official leh MzSRLM hnuaia SHG member-te'n video conferencing hmangin an chhim. Mizoramah DAY-NRLM hnuaiah SHG 7,976 a awm.

Assembly jubilee lawm dan tur rêl
Mizoram Legislative Assembly Golden Jubilee Organising Committee chu nimin khan an chairman Lalrinliana Sailo, speaker hoin an ṭhukhawm a, Assembly jubilee lawm dan tur an sawiho. Jubilee chu ni hnih chhung lawm an rêl bakah, jubilee pualin Assembly special session neih an rêl.

MOT leh LTF
Medical Operational Team (MOT) on Covid-19 chuan nimin khan Assembly conference hall-ah a ni hnihna atan an chairman Dr ZR Thiamsanga hoin Aizawl Municipal Corporation (AMC) huam chhunga local task force hruaitute an kâwm a, Covid-19 chungchang an sawipui. MOT hian August 11 khan AMC ward I-X huam chhunga LTF-te an kâwm tawh a, nimin khan ward XI-XIX chhunga LTF-te an kâwm leh a ni.

Thisen pe
MFM School of Nursing chuan nimin khan Civil Hospital, Aizawl tan thgisen unit 23 an pe a, petute mipa 19 leh hmeichhia pali an ni. Blood bank-a kala mimal thisen pe mi 13 an awm bawk. KṬP, Sihphir Venglai Branch pawhin an din champha vawi 30-na pualin nimin khan Synod Hospital blood bank-ah thisen unit 17 an pe a, petute mipa 16 leh hmeichhia pakhat an ni.