Hripui vangin mi pakhat a thi

August 11, Nilaini zan dar 9:30 khan Covid-19 vei enkawl lai Hmarchhungi (58) w/o Manliana, Maubawk, Aizawl chu State Referral Hospital-ah a thi a, hripui vanga Mizorama thi 173-na a ni.

Thu dawn danin, Hmarchhungi hi cancer vei enkawl lai a ni a, Covid-19 positive a ni tih zanin August 7, 2021 khan hmuh chhuah niin, SRH-ZMC-a enkawl turin lak nghal a ni. A ruang hi Nilaini zan khan Maubawk Presbyterian Kohhran Hall-ah lumen a ni a, nimin chawhma dar 11 khan vui a ni.

Sorkar chhinchhiah angin, Mizoram­ah Covid-19 vangin mi 173 an thi tawh a, August 2021-ah mi 25 an thi tawh.

Nikum October thlaah mi pakhat, November-ah mi panga leh December-ah mi pahnih an thi a; kumin 2021 January, February leh March thlaah mi pakhat ṭheuh, April-ah mi pali, May-ah mi 25, June-ah mi 53, July thlaah mi 55 an thi a ni.