COVID-19: Mizoram dinhmun : Hripui vei 576 hmuh belh a ni

August 11, Nilaini khan Mizoramah Covid-19 vei mi 576 hmuh chhuah a ni a, Nilaini zanah mi pakhat a thi. Nimin khan hripui laka fihlim tawh mi 506 chhuahtir an ni.

Covid-19 vei hmuh tharte chu mipa 276 leh hmeichhia 300 an ni a; ZMC laboratory-a hmuh chhuah pahnih, TrueNAT-PCR hmanga hmuh 66 leh Rapid Antigen Test hmanga hmuh 508 an ni.

Hripui vei hmuh thar mi 576-te chu symptom nei 312 leh nei lo 264 an ni a; tualchhunga kái 567 leh state pawn aṭanga tun hnaia rawn lut pakua niin, tualchhunga kái zingah kàina chin hriat loh mi 297 an awm.

IDSP record angin, Mizoramah Covid-19 vei 46,896 hmuh chhuah a ni tawh a, mipa 24,392 leh hmeichhia 22,504 an ni. Nimin tlai dar 5 thleng khan mi 35,240 (75.14%) chhuahtir an ni tawh a, mi 173 (0.37%) thi tawhin, enkawl mek mi 11,483 (24.49%) an awm.

August 11, Nilainia swab sample endik dan chu - ZMC laboratory-ah 95, TrueNAT hmangin district pakuaah 310 leh RAT hmangin district 10-ah 5,787 a ni a, a vaiin sample 6,192 niin, hripui vei hmuh chhuah 576 chu 9.30% a tling. Positive percentage hi ZMC-ah 2.10, TrueNAT-ah 21.29 leh RAT-ah 8.77 a ni.

District hrang hranga Covid-19 positive hmuh chhuah zat chu - Aizawlah mi 323, Kolasib-ah 71, Champhaiah 57, Lungleiah 38, Lawngtlaiah 35, Mamitah 28, Siahaah 17, Saitualah pali, Hnahthialah pahnih leh Serchhipah pakhat a ni. Aizawla veng 57 leh khaw dang 34-a mite an ni a; Lungleia veng 11 leh, Kolasib leh Lawngtlaia veng pariat ve ve a lang.

Hripui vei hmuh thar mi 576 zingah naupang kum tling lo 180 vel awmin, an zinga a zatve velin symptom an nei a; nausén kum khat tling lo pasarih awmin, a naupang ber chu ni 8 mi a ni. Kum 60 chung lam 40 vel awmin, an zinga a tam zawkin symptom a nei a, a upa ber chu kum 83 mi a ni.

August thlaa ni 10 chhungin Mizoramah Covid-19 vei mi 7,972 hmuh chhuah a ni tawh a, chawhrualin ni tin mi 724.73 hmuh chhuah an awm ang a ni. Mizorama Covid-19 vei hmuh tawh zat 46,896 chu kum 2011 chhiarpui angin, Mizorama mi 1,000 zelah hripui vei mi 43 an awm ang a tling.

Nimin khan tlai dar 5 thlengin hripui laka fihlim tawh mi 506 chhuahtir an ni a; Aizawl district-ah mi 455, Lawngtlai district-ah 13, Kolasib district-ah 11, Mamit district-ah pariat, Siaha leh Champhai district-ah pasarih ve ve, Serchhip district-ah pali leh Lunglei district-ah pakhat an chhuak. Nilaini khan zana chhuakte nen mi 1,012 chhuahtir an ni a, chhuak an tam ber ní a nia thu dawn a ni.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 11,897 hmuh chhuah a ni tawh a, TrueNAT-PCR hmangin 2,768, RAT hmangin 32,228, FIA hmangin pahnih leh Guwahati-ah pakhat hmuh chhuah a ni tawh.

IDSP tarlan danin, August 11, 2021 thlengin Mizoramah swab sample 7,01,895 endik a ni tawh a, chu'ng aṭanga Covid-19 vei hmuh tawh zat 46,896 chu 6.68% a ni. Hripui vei hmuh tawh zinga mi 42,633 chu Mizoram chhunga kái chhâwng an ni a, mi 4,263 chu Mizoram páwn aṭanga an rawn luh hnua hmuh chhuah an ni.