Ramri buai a awm leh palh atan Mizoram sorkarin hma a la - Serlui MLA

Serlui bialtu MLA Lalrinsanga Ralte chuan, ramri-ah buaina a awm leh palh pawha Mizoramin harsatna a tawh lohna turin chief minister Zoramthanga kaihhruai sorkarin hma a lak mek thu a sawi.

Lalrinsanga Ralte hian nimina Bilkhawthlir a tlawhnaah thu sawiin, Mizoram sorkarin Serlui bial chhung hmun tam takah ramri humhalhna tura hna an thawh mek thu a sawi a, "Kan ṭhenawm state-te'n kan ram lui luang aṭanga lak chhuah balu-ah hlâwkna an tel mek. Serlui balu chu a thlang lawk Bagha-ah an lo la chhuak a, Bagha balu tiin kan duh em em a ni," a ti.

Bagha balu ṭha nia sawite chu a chhak lawka Mizoram chhungah lak ve theih reng nia sawiin Lalrinsanga chuan, "Kawng a awm ṭhat loh avangin balu lâkah harsatna kan tâwk nasa a, kan ṭhenawmte hian kan lui luang aṭanga hlâwkna an tél char char hi sorkarin ṭha a ti lo," a ti a; balu-ah Mizo mipuite'n hlâwkna an neih theihna turin Serlui bial chhung leh hmun hrang hrangah ruahmanna siam mek a nih thu a sawi.

Lalrinsanga Ralte chuan, sorkarin ram leh hnam humhalh nan theihtawp a chhuah tih sawiin, "Mizoram leh hnam chhanna atana mipui inpekna leh inhuamnate a lawmawm. A bik takin ramri dep khuate inpekna leh huaisenna a ropui. Vairengte mipui hi Zoram mipuite entawn tlak, ram leh hnam tana eng pawh huam an ni," a ti.

Serlui bialtu MLA Lalrinsanga Ralte hian Bilkhawthlira community covid care centre pahnih a tlawh a, Rs. 25,000, oxygen concentrator pakhat leh PPE 10 ve ve a pe.