Minister-in Chuhvel khua a tlawh

Power & Electricity minister R Lalzirliana chuan nimin khan Mamit district-a Assam hnaiha khua, Chuhvel a tlawh a; khaw mipuite'n ṭha taka sorkar an thawhpuinaah lawmthu hrilhin, sipaite thâ tichaktu ni zel turin a chah.

R Lalzirliana chuan, Mizoram venhimna tura thâ thawhtu zawng zawngte chungah lawmthu sawiin, "Kan ram min hnehchhuh tum a, foreigner min dahsak tumtute laka kan ram kan la humhim zel thei hi Pathian ṭanpuina a ni. Mizoram ṭhalai, a bik takin Vairengte mipui leh kan police-te huaisenna chhuanawm hle," a ti.

Power Minister chuan, Chuhvel khua mai bakah, ram buaina hmun John Halliday-a thlám bulah transformer bun a, police duty-na hmun thlenga electric current la lut turin Mamita PE department-in hma an lak mek thu a sawi.

R Lalzirliana hian Mizoram police duty-te sa leina atan Rs. 30,000 leh electric current peih a nih hmaa an hman tur solar hmanrua 10 a pe a; Chuhvel VC Leh tlawmngai pawlte hman tur Rs. 5,000 a pe bawk. Minister hi deputy chief whip Lalrintluanga Sailo leh MLA dang pahnih - H Lalzirliana leh Lalrinsanga Ralte ten an ṭawiawm a ni.