Chief Minister-in KDZKT Road a hawng : Intodelh leh entawntlakah kan ram kan siam thei- CM

Khedacherra-Damcherra-Zamuang-Kawrthah-Tuilutkawn (KDZKT) kawng, km. 84.50-a thui chu nimin khan chief minister Zoramthanga'n Tuidamah a hawng. Tuidam Presbyterian kohhran hall-a kawng hawn inkhawm neihah Chief Minister chuan, Mizoram chu ram intodelh leh entawntlaka siam theih a nih thu a sawi.

CM Zoramthanga chuan, sorkarin ei tura intodelh a ngaih pawimawh thu sawiin, "Thawhhona ṭha tak nen ram intodelh leh entawn tlakah kan ram hi kan siam thei. Mizoram pumpui tan chawa intodelh tur chuan thingtlang lo neiha kum tin ram vah kual ni loin, leileta siam theih lai lai leiletah siam a, khawl hmanga enkawlin, tha sên ngai tam si loin buh kan mamawh chu kan thar chhuak mai thei ang," a ti.

Tun hnaia Mizoram thil tawn aṭangin thlai leh thei lamah intodelh theih a ni tih a lan thu sawiin Zoramthanga chuan, "Sa leh thil dang remchang apiangah intodelh tum a ni," a ti a; sumchang thlaite chu a nih ang anga thawn chhuak mai loin, hlâwkna tam zawk hai luh theih nan mahni ram chhungah ngei man man zawka siam turin processing plant-te dah a, kawng hrang hranga hmalak theihna a awm thu a sawi.

Chief Minister chuan, sorkarin a tih tur chinah theihtawp a chhuah zel tur thu sawiin, "Kan rilru leh ngaihtuahnate siam tharin, kan ram hi ropui taka siam tura kan Pathianin min duhna hi vawng chunga kan theih chin ṭheuhah i thawk ang u," a ti.

Ei leh bàra hmasawnna turin kawng leh inkalpawhna ṭha a pawimawh thu sawiin CM Zoramthanga chuan, "KDZKT kawngpui hi Zoram pum tan leh a bik takin khawtlang tan ṭangkai tak a ni. Hmabak la awm pawh zawh thuai ka beisei," a ti a; Covid-19 lengin hun rei tak chhung hmasawnna hna a tiṭhuanawp chungin, thawktute'n theihtawp chhuaha hma an lakna lawmawm a tih thu a sawi.

Road & Infrastructure Development Board vice chairman H Lalzirliana, MLA pawhin thu sawiin, "Vawiina hawn tâk kawng thar hi Hachhek tlangdung zawha ṭhenawm state thlun zawmtu a nih avangin economic road pawimawh tak a nih bakah, Tripura-a kan unaute nen pawh inpawhna ṭha siamtu pawimawh tak a ni," a ti a; kawngpui hmangtute chu dimdawi taka enkawl thiam turin a chah.

KDZKT kawngpui siamna atan hian North Eastern Council chuan January 9, 2013 khan cheng vbc. 134.70 (estimate amount) a pe chhuak a, Mizoram sorkarin a tum ve tur chu 10% a ni. DRAIPL & ABCI Ltd (JV), Guwahati chu May 25, 2015 khan cheng vbc. 179.63 hmanga kawng siam hna hi thawk tura thlan an ni.

Sanction leh work order pek karah rate thar a chhuah avangin thawk tura intiamna zat a sang a; July 1, 2017 aṭanga GST hman a nih avangin kawng siamna tur sum mamawh zat chu ennawn a ngai a, cheng vbc. 183.27-a siam danglam lehna chu phalna ngaihchan mek a ni. KDZKT road hian Assam leh Tripura state-te a thlun zawm.

Kawngpui hian Mizorama khua 12 a paltlang a, Bairabi-Zamuang road, Natio­nal Highway-44A (Mizoram-Tripura), Bunghmun-Thaidawr (PMGSY road) leh Bunghmun-Mualṭhuam (PMGSY) road-te nen an inthlun zawm bawk.