Assam aṭanga ei tur lut an endik Mihring tana him lo an hmu lo

Health & Family Welfare hnuaia Food & Drugs Administration (FDA) chuan August 12, Ningani zan khan Rengtekawnah Assam aṭanga chawhmeh, thlai leh sangha rawn lutte an endik a, mihring tana him lo an hmu lo.

Vanglaini palai zawhna chhángin Health Services joint director (FDA) Lalsawma chuan, fimkhur thilah Assam aṭanga ei leh in tur rawn lutte chu an endik tih a sawi a, "Kan endik zan hian motor lut a tlem a, an rawn phur luhte chu tomato, thlai leh sangha a ni deuh ber. Kan lo endik a, mihring tana him lo kan hmu lo a, a lawmawm khawp mai," a ti.

Hetih lai hian, Mizoram leh Assam ramri buai hnuah social media hrang hrangah Assam aṭangin chawhmeh, thlai leh sanghaa túr kah luh Mizoramah an rawn thawn lut nia sawi a darh nasa a, finfiahna erawh a la awm lo thung.