Governor-in I-Day thuchah a tichhuak Inpumkhatna vawng nung zel ang u - Larsap

August 15, naktuk Pathianni hi India ram zalena ni, Independence Day (I-Day) vawi 75-na a ni a, India ram pumah lawm a ni dawn. Zalenna ni pual hian Governor Brig. BD Mishra chuan thuchah a tichhuak a, Mizoram mipuite duhsakna hlànin, ram leh hnam inpumkhatna vawng nung zel turin a chah.

Governor chuan, Mizoram mipuite chu I-Day chibai bûkin, India ram zalenna atana theihtawp chhuahtute inpekna leh thil ropui tak an tihte chu hre thar leh turin a chah a, "Kan tana nunna hial hlântute chawimawina sang ber kan hlàn a, zahna chibai kan bûk a ni. Tunah chuan khawvela mipui duh dana rorelna ram lian ber kan ni ta hial a, kan inchhuang em em a ni," a ti.

India hnam pa Mahatma Gandhi hmalakna chu prime minister Narendra Modi-a'n a chhunzawm zel nia sawiin Brig. BD Mishra chuan, "Ram mipuite chu kan zavaia huapzo hmasawnna leh inrintâwkna min pe mek. PM Modi kaihhruaina hnuaiah India chu khawvela ram hausa, hmasawn leh sorkar chak zingah a tel mek a ni," a ti a; India ram chu hmasawn berte zinga mi, ram ropuite zah kái a ni tawh tih a sawi.

Ram innghahna thupui chu, 'Mi chi hrang hrang awm khawmte inpumkhata chênho dial dial' tia sawi ṭhin a ni tih sawiin Larsap chuan, "Hei hi tuna hun harsa kan tawh mekah a pawimawhzia kan hmu chiang hle. Covid-19 léng avangin khawvelin harsatna kawng tinréngah a tâwk mek a, Mizoram pawhin he harsatna hi kan hmachhawn mek a ni," a ti.

Governor chuan, PM Narendra Modi leh Mizoram chief minister Zoramthanga te finna leh hmalakna chak tak avangin an zâm lo a, theihtawp an chhuah mek tih sawiin, "Covid-19 donaa thawktu te, sorkar hnathawk te, damdawi lam thiam leh thawktu te, tlawmngai pawl, khawtlang hruaitute leh kohhran hruaitute an thawh ṭhat êm avangin ka chhuang tak zet a ni," a ti a; ṭanrual chu chakna a nih avangin hripui donaah hnehna an chan ngei a rin tlat thu a sawi.

Hripui vanga harsatna chu PM Modi chuan thiam takin ram intodelhna thawh chhuah nan a hmang nia sawiin BD Mishra chuan, intodelhna kawngah Mizoramin ṭan a lâk kan ngai tih a sawi a; hripui léng vanga harsatna thleng mek chu hmasawnna leh hlawhtlinna thar thawh chhuah nan hman tum turin mipui a chah.

Tokyo Olympics-a India aiawh chhuakte hlawhtlinna chu a lawmpui tih sawiin Larsap chuan, Lalremsiami, Indian women hockey team-a pawimawh ber pakhatin ropui taka Olympics semi final a khelh avangin a chhuan tak zet thu a sawi.

Governor chuan, "Kan ram zalen­­na atana sualtute duh dan leh hma­thlirte tihlawhtling turin kan zavaiin inhlàn thar leh ṭheuh ila. Kan inpumkhatna leh zái khata kan luanhona hi vawng nung zel turin kan theihna zawng zawng hmang chhun­zawm turin kan inngen a ni," a ti.