MZP, MSU leh MNF-te'n MP K Vanlalvena tawlhlohpuan hlân

Rajya Sabha MP K Vanlalvena chu Delhi aṭangin nimin khan a rawn haw a, Lengpui Airport-ah MZP, MSU leh MNF party hruaitute'n lo hmuakin, Tawlhlohpuan an lo hlàn. MP chuan, ramria buaina chungchanga party sawi loa Mizo mipui an ṭangrual ṭhap chu ropui a tih thu a sawi.

MP K Vanlalvena chuan, July 26, 2021 tlaia Assam leh Mizoram police-te inkahna chung­changah, "Kan police camp ngei an rawn hnehchhuh a, khatiang pawha kan kâp ngam lo a nih chuan Mizo hnam hi kan awm a ṭul lo ang. Kha inkahna kha kan hnam zahawm humhimna tur a ni. Assam nen kan in leh ram zîmte kan inchuh a ni mai lo, hnam zahawmna kan inchuh tel a ni," a ti.

K Vanlalvena chuan, "Media-te'n Assam ho sawi an hriat hmangin Assam ṭan sa pânga zawhna min zawh avangin na ve deuh taka react a ngai a nih hi ka ti a. MP sawi atan leh kohhran rawngbawltu tan chuan a mawi lo tih a awm thei a, mahse, a hun lai azirin a ṭul a ni. Miin indo an ngam a nih chuan indo kan ngam a ni tih khawi level-ah pawh ni se kan sawi ve a ni," a ti a; a hmelhriat ngai loh a MP-puite pawhin an hrethiam nia a hriat thu a sawi.

Tun ṭuma Mizoram leh Assam buainaa Mizoram mipui ṭanrualnaah lawmthu sawiin Vanlalvena chuan, "Party party sawi loin kan ṭangrual ṭhap mai hi a ropui. Party-te chu a hun laiin inbei mah ila, ZPM ṭhalai phei chuan ka thlavâng hauhna an chhuah a, a ropui ka ti. Central YMA, MZP, MSU-te'n ka thlavâng huauhna thu an chhuah avangin a lawmawm a, Vairengte khawtlang pawh an fakawm tak zet a ni," a ti.

K Vanlalvena chuan, "Remna leh muanna kan duh a, hei hi min pal bawrh bawrh nan a rem lo tih kan CM leh Dy CM-te'n an lantir rap kha kan zahawm phahin ka hria a, ṭhalai rual rilru na tam tak min thawi dam bawk a ni," a ti a; a hun taka Mizoram police-te huaisenzia a lan thu a sawi.