Hnahthiala phûl lem phah a kal tluang lo Matching share kan hmang ngai lo - SYS Minister
Sports minister Robert Romawia Royte chuan, Saitual leh Hnathial field-a phûl lem phah chu khaihlak awm loa kal tluang a nih loh thu a sawi a, "Hnathawh chhunzawm leh a nih theihna atan theihtawp chhuahin kan nawr. Ka department chan hnuaiah hian state matching share (SMS) kan hmang ngai lo," a ti.
Sports Minister hian nimin khan a pisaah thuthar thehdarhtute a kâwm a; MPCC general secretary John Siamkunga'n thuthar thehdarhtute a kawmnaah, Hnahthial field-a phûl lem phah chungchangah, 'He project hi thawh lai reng, tihtawp lailâwk a ni lo. Thu dik lo sawi zeuh chìn hi ram hruaitu tan chîn loh a ṭha' tia a sawi chu thu dik lo a nih thu a sawi.
Robert Romawia chuan, Saitual leh Hnahthial khelmuala phûl lem phah chu first instalment aṭangin kum 2018-ah thawh ṭan a nih laiin, May 7, 2018-ah NEC secretary Ram Muivah chuan project chu titawp rih tur leh first instalment sum pek sa pawh hmang lo turin Mizoram sorkar a hriattir tih a sawi a, "MNF sorkar a lo piana Sports minister ka nih hlim khan field pahnihah hian hna thawh zawm a nih theih nan ṭan kan la nghal a ni," a ti.
Sports Minister sawi danin, Saitual leh Hnahthiala phûl lem phah hna tàwp chu ṭha an tih loh avangin NEC-ah an nawr a, kalphung thar an siamah line ministry-in technical vetting a tih phawt loh sanction thar pek theih a ni lo. Hei vang hian line ministry-ah techincal vetting dilna thawn ṭhin a ni a, line ministry chuan August 21, 2019 khan NEC hnenah technical vetting an pe. NEC pawhin October 21, 2019 khan Saitual leh Hnahthial field-a phûl lem phah chhunzawm phalna Mizoram sorkarah a pe a ni.
Field pahniha phûl lem phah a nih theihna atana sorkar hmasa hmalakna lawmawm a tih thu sawiin Robert Romawia chuan, "An duh dan ni loa thil a kal avang chauhin thawh zawm theih a ni lo. First instalment pawh hman loh tura NEC-in an tih laiin, chak taka hna an thawh avangin an hmang zo hman a ni. A tàwp mai tur chu ṭha kan ti lo a, theihtawpin kan ûm zui a ni," a ti.
SYS Minister chuan, sorkar hmasa hmalaknate chu a theih ang anga ûm zui zel ṭha a tih thu sawiin, "Project thi hman a tam a, hetianga Saitual leh Hnahthial a kaltlang thei hi a lawmawm hle a ni," a ti a; sorkar hmasa hmalakna theihtawpa an ûm zui laia mipui hnena thu dik lo hrilh chu ṭha lo a tih thu a sawi. India rama state tam takin centrally sponsored scheme (CSS) hlutna an hriat chian thu sawiin Robert Romawia chuan, "An tan 50:50 sharing a ni fur a, chuti chung pawh chuan an chuh na hle. MPCC unaute'n 90:10 ratio nei project an sawi hnâwm lek lek hi a mak a. An press release-a GST lak hnuah 4% pek belh anga an sawi hi hriat fuh loh niin a lang," a ti.
Minister chuan, contractor-te'n labour cess 1% Mizoram sorkarah an pek tel avangin CSS-ah Mizoram sorkarin a tum ngai chu 4% ni loin, 3% a nih zawk thu a sawi a, "Chu 3% chu mi dang pek a ni lo a, Mizoram sorkarin amah leh amah a inpe a ni. CSS hnuaiah central-in 97% thawhin, state-in 3% chiah a thawh a ni," tiin, CSS hnuaia hnathawhte chu state ta vek a nih thu a sawi.
Zawhna chhangin SYS Minister chuan, a enkawl department hnuaiah state matching share (SMS) an hmang ngai lo tih sawiin, "Sports dept. ka enkawl hmaa project-ah cheng nuai 10 vel kan hmang a, Tourism department-ah pawh chutiang vel bak kan hmang lo ang. ICT-ah kan la hmang lo," a ti.
Sports Minister sawi danin, sum an hmuhna ber Khelo India Scheme leh NEC funding chu 100% funding a ni. Sum hmuhna hnár dang PMJVK chu 90:10 a ni a, 100% funding turin an nawr mek. PMJVK hi 90:10 ni mah se, tun dinhmunah chuan Mizoram sorkarin state matching share pek a la nei lo a ni.