Lungleia RT-PCR lab. dinna atan Sorkarah tourist lodge rawt dawn

Mizoram sorkarin Gauhati High Court, Aizawl Bench thu anga Lungleia RT-PCR bun a nih theihna tura hma latu tur committee a din chuan RT-PCR laboratory dinna atan Mizoram sorkarah Tourist Lodge, Lunglei an rawt dawn.

Committee member-te hi nimin khan an chairman Health & Family Welfare principal director Dr F Lallianhlira hoin Tourist Lodge, Lungleiah an ṭhukhawm a; RT-PCR dinna atan Tourist Lodge a remchan dawn leh dawn loh an enfiah nghal.

Laboratory dinna atan Tourist Lodge hlui zawk enfiah a ni a, a chung zawk chu tui a far nasat avangin a rem loah an ngai. A hnuai zawkah erawh chuan laboratory a din theih turah an ngai a, engineer-te'n measurement an la nghal a ni.

YMA Sub-Hqrs., Lunglei president Lalrotluanga hnen aṭanga Vanglaini thu dawn danin, ZMC-a mithiamte pawhin Tourist Lodge hnuai zawkah RT-PCR laboratory din theih turah an ngai a; chutih rualin, pindante chu chei ṭhat a ngai dawn.

Committee-a Lunglei aiawha telte chuan, eng emaw avanga Tourist Lodge a remchang lo a nih chuan, Expert Team-te'n RT-PCR laboratory din theihna tura nikuma an lo ngaih tawh Lunglei Civil Hospital chung lama pindan ruak chu enfiah leh an rawt bawk.

Tarlan tawh angin, Committee-ah hian chair­man chu HFW Principal Director a ni a, member secretary chu Hospital & Medical Education Director a ni. Member-te chu - Lunglei Civil Hospital-a Medical Superintendent, Lunglei Sub-Hqrs. YMA President leh Lunglei Ṭhalai Pawl Chief Organiser-te an ni.

Committee hi August 9, 2021 khan din a ni a, din a nih aṭanga ni sarih chhungin Tourist Lodge, Lunglei leh in dang awm sa, RT-PCR laboratory din theihna tur enfiah tura tih an ni.

An thil enfiahnaa an hmuh dan leh rawtnate chu committee chuan HFW department-ah an thlen dawn a, a ṭul angin hmalak zui a ni ang.