KHAWTHLIR

CM-in Lengpui Airport a enfiah
Chief minister Zoramthanga chuan nimin khan Lengpui Airport a tlawh a, airport chei ṭhat hna thawh mekte a enfiah. Tun dinhmunah terminal building chhung siamṭhat te, a pawna elevated road leh parking area siam belh hnate leh CRPF-te awmna hmun tur siamṭhat hnate thawh mek a ni.

Hmanrua sem
Lunglei High Powered Committee (HPC) vice chairman Lawmawma Tochhawng chuan nimin khan Lungleia Horticulture pisa conference hall-ah iskut enkawlna hmanrua - thirzái leh tui pekna (water can)-te Lunglei district-a chhungkaw 14 hnenah a hlân.

Airport hnaihah Drone khap
General Administration department hnuaia Aviation Wing chuan, Lengpui Airport leh a chhehvel km. 3 bial chhungah drone leh remote control thlawhnate thlawhtir khap a nih thu nimin khan a puang.

Thisen pe
Siaha Council Veng Branch YMA chuan nimin khan Siaha District Hospital-ah thisen unit 11 an pe a, petute hi hmeichhia paruk leh mipa panga an ni. Kolasib 05 Youth Riders pawhin nimin khan Kolasib District Hospital-ah thisen pek an huaihawt a, mipa pariat leh hmeichhia pahnihte'n thisen unit 10 an pe a ni.

Damdawi-inah MLA Andrew Thangliana
Tuirial bialtu MLA Andrew H Thangliana chu a damloh avangin Ebenezer Medical Center-ah enkawl mek a ni a, nimin khan ICU-ah dah luh a ni. A chhungte hnen aṭanga thu dawn danin, Andrew H Thangliana hi cancer a ni a, pneumonia a nei tel bawk a, July 21, 2021 khan damdawi-inah an indah lut. Hun eng emaw chen HDU-a enkawl a nih hnuah nimin khan ICU-ah dah luh a ni.