COVID-19: Mizoram dinhmun : Hripui vei 575 hmuh belh a ni

August 12, Ningani khan Mizoramah Covid-19 vei mi 575 hmuh chhuah a ni a, zanah mi pakhat a thi. Nimin khan hripui laka fihlim tawh mi 638 chhuahtir an ni.

Covid-19 vei hmuh tharte chu mipa 280 leh hmeichhia 295 an ni a; TrueNAT-PCR hmanga hmuh chhuah 16 leh RAT hmanga hmuh chhuah 559 an ni. ZMC laboratory leh Fluorescent Immunoassay (FIA) hmanga sample endik awm mah se, hripui vei hmuh a ni lo.

Hripui vei hmuh thar mi 575-te chu symptom nei 361 leh nei lo 214 an ni a; tualchhunga kái 574 leh state pawn aṭanga tun hnaia rawn lut pakhat niin, tualchhunga kái zingah kàina chin hriat loh mi 286 an awm.

IDSP record angin, Mizoramah Covid-19 vei 47,471 hmuh chhuah a ni tawh a, mipa 24,672 leh hmeichhia 22,799 an ni. Nimin tlai dar 5 thleng khan mi 36,315 (76.50%) chhuahtir an ni tawh a, mi 174 (0.37%) thi tawhin, enkawl mek mi 10,982 (23.13%) an awm.

August 12, Ningania swab sample endik dan chu - ZMC laboratory-ah 92, TrueNAT hmangin district parukah 229, RAT hmangin district 10-ah 7,740 leh FIA hmangin Aizawlah 22 a ni a, a vaiin sample 8,083 niin, hripui vei hmuh chhuah 575 chu 7.11% a tling. Positive percentage hi ZMC-ah 0.00, TrueNAT-ah 6.98, RAT-ah 7.22 leh FIA-ah 0.00% a ni.

District hrang hranga Covid-19 positive hmuh chhuah zat chu - Aizawlah mi 302, Kolasib-ah 97, Mamitah 55, Lawngtlaiah 50, Lungleiah 35, Ser­chhipah 19, Cham­phaiah pakua, Hnah­thialah panga leh Saitualah pathum an ni. Aizawla veng 52 leh khaw dang 29-a mite an ni a; Kolasib-a veng 10 leh Lunglei leh Lawng­tlaia veng pasarih ve ve a lang.

Hripui vei hmuh thar mi 575 zingah naupang kum tling lo 180 chuang awmin, an zinga a zatve aia tamin symptom an nei a; nausén kum khat tling lo paruk an awm. Kum 60 chung lam 40 vel awmin, an zinga a tam zawkin symptom a nei a, kum 90 chung lam pahnih an tel a ni.

August thlaa ni 10 chhungin Mizoramah Covid-19 vei mi 8,547 hmuh chhuah a ni tawh a, chawhrualin ni tin mi 712.25 hmuh chhuah an awm ang a ni. Mizorama Covid-19 vei hmuh tawh zat 47,471 chu kum 2011 chhiarpui angin, Mizorama mi 1,000 zelah hripui vei mi 43 an awm ang a tling.

Nimin khan tlai dar 5 thlengin hripui laka fihlim tawh mi 638 chhuahtir an ni a; Aizawl district-ah mi 579, Lawngtlai district-ah 32, Siaha district-ah 17, Champhai district-ah panga, Serchhip district-ah pathum leh Lunglei district-ah pahnih an chhuak.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 11,897 hmuh chhuah a ni tawh a, TrueNAT-PCR hmangin 2,784, RAT hmangin 32,787, FIA hmangin pahnih leh Guwahati-ah pakhat hmuh chhuah a ni tawh.

IDSP tarlan danin, August 12, 2021 thlengin Mizoramah swab sample 7,09,978 endik a ni tawh a, chu'ng aṭanga Covid-19 vei hmuh tawh zat 47,471 chu 6.69% a ni. Hripui vei hmuh tawh zinga mi 43,207 chu Mizoram chhunga kái chhâwng an ni a, mi 4,264 chu Mizoram páwn aṭanga an rawn luh hnua hmuh chhuah an ni.