Fit India Freedom Run buatsaih a ni

India Independence Day kum 75-na lawmna, Azadi ka Amrut Mahotsav pualin Serchhip district Nehru Yuva Kendra Sangathan (NYKS) leh Serchhip College National Service Scheme (NSS)-te buatsaih chuan nimin zing khan Serchhip leh East Lungdarah Fit India Freedom Run an buatsaih.

Serchhipa Fit India Freedom Run ṭan hmaa inkhawm tawi buatsaih niin, Serchhip College-a NSS programme officer C Lalramliana'n a kaihhruai a; an tlân zawhah Serchhip College hall-ah taksa sawizawina hun an hmang leh bawk.

Fit India Movement hi Ministry of Youth Affairs & Sports hnuaia kalpui niin, August 29, 2019 khan Prime Minister-in a hawng a, ram chhunga district 744-ah kalpui a ni. Tuna kalpui mek hi August 13 aṭanga October 2, 2021 thlenga kalpui tur niin, India ram pum huapin Youth Affairs & Sports minister Anurag Singh Thakur leh minister of state Natish Pramanik ten an hawng a; thupui chu 'Jan Bhagidari Se Jan Aadolan' tih a ni.

Fit India Freedom Run chungchangah hian Lunglei DC Kulothungan A chuan nimin khan a pisaah press conference a nei a, August 21, 2021-a Lungleia an buatsaih tur chungchang a sawifiah.