Remchang hmasa berah dental doctor la turin kan inruahman - Health Minister

Health & Family Welfare minister Dr R Lalthangliana chuan, Mizoram sorkarin ha (dental) lam thiam doctor kum 20 chhung a la tawh lo tih sawiin, remchang hmasa bera la turin an inruahman thu a sawi.

HFW Minister hian nimin khan Mizorama damdawi-in hmasa ber North Vanlaiphai damdawi-in (primary health centre), kum 1913-a din chu a tlawh a, damdawi-ina thawkte leh khawtlang hruaitute nen an inkâwm. Nimin vêk khan Cherhlun RD Rest House-ah sorkar official leh khawtlang hruaitute nen an inkâwm bawk.

Dr R Lalthangliana chuan, World Bank project cheng vbc. 220 an hlawhtlinpui ṭan nia sawiin, "Damdawi-in leh sub-centre hrang hrang tihchangtlunna atan hman a ni ang. Health department-a hna ruak hrang hrang 740 lak mai tura kan tihte pawh Covid vangin kan la thei mai lo a, boruak a ziaawm dan azira hnawhkhah kan tum dawn a ni," a ti.

India ram hmun thenkhatah Covid-19 a kiam laiin, Mizoramah an la ziaawm thei lo a, thâ thlah loa beih chhunzawm a la ngaih thu sawiin Minister chuan, "SEDP atan sum ruahmanna kan kalpui dawn chauh a, department zawng zawng a nghawng a, Covid awm lo se SEDP pawh kan kalpuina a rei tawh ang," a ti a; Covid-19 avangin sorkar hna leh contract-te an inpek theih loh phah tih a sawi.

Health Minister chuan, Covid-19 vaccine lâk a pawimawh tih sawiin, la la lote chu la vek turin a ngen a, "Vaccine lakah India ramah a ti ṭha ber pasarihna kan ni a, hmarchhakah a ti ṭha pahnihna kan ni," a ti.

Dr R Lalthangliana hian Horticulture department kaltlanga zîkhlûm chíngtute leh Games and Sports Association-te hnenah thil pek chi hrang hrang a hlan a ni.