Independence Day vawi 75-na lawm a ni Hripui kan hneh ngei ka ring tlat - CM

Nimin August 15 kha India ramin Britain laka zalenna a hmuh champha, Independence Day vawi 75-na a ni a, Mizoram hmun hrang hrangah lawm a ni. Aizawlah chuan Lammualah lawm a ni a, chief minister Zoramthanga'n hnam puanzar a pawt pharh. Chief Minister chuan, "Covid-19 hripui hi kan hneh ngei ka ring tlat a ni," a ti.

CM Zoramthanga chuan, mipui huaisenna, inpekna, tawrhchhelna leh tumruhna avangin India ramin zalenna a sual chhuak tih sawiin, "Tuna kan hmachhawn hripui pawh hi kan hneh leh ngei dawn tih ka ring tlat a ni. Harsatna kan hmachhawn mekah hian zam mai loin, tumruhna, huaisenna, thuawihna leh chhelna nen hma lam i pang ang u," a ti a; hma lamah hlawhtlinna lian zawkin a hmuak a ni tih hre turin Mizoram mipui a chah.

Kum hmasa lam aṭangin harsatna lian tak tak Mizoramin a tâwk tih sawiin CM Zorama chuan, "Kan hun tawn leh harsatna aṭangte hian mi dangte kan mamawhna bakah, nun khawchhuahna atana ṭanrual pawimawhnate kan hre chiang leh zual. Hripui lêng hi mihringte inthlahdah vang leh khawvel enkawlnaa kan tih tur kan tih tawk loh vangah a ngaih theih àwm e. Kan zain leilung, ramngaw leh nungcha humhalh kawngahte rilru thar púin hma lam kan pan a ngai a ni," a ti.

Chief Minister chuan, mipui himna leh damna tura rim taka thawktu - doctor, nurse leh healthcare worker zawng zawng zahna chibai bûkin, "Mizoram mipui hian kan tana in inpekna hlu tak hi kan hre reng tawh dawn a ni," a ti a; hripui léng vanga inkhàrkhip laia ei tur kan tlakchham lohna tura kut hnathawktute thilphalna te, sum leh hlâwkna ûm loa a mamawhtute tana an thawhrimna rahte phal taka pe ṭhintute chawimawi an phu thu a tarlang.

Zoramthanga chuan, mipui himna tura sorkarin inkaihhruaina a tihchhuahte ṭha taka zawm a nih theih nan task force, khawtlang hruaitu, tlawmngai pawl, Covid-19 volunteer-te leh kohhran hruaitute thawhrimna leh hlawhtlinnaah a lawm thu a sawi a ni.

Chief Minister sawi danin, Mizoram sorkarin ram venhim a ngai pawimawh a, chak takin hma a la chhunzawm zel a ni. Mizoram police-te ṭan lakna leh thawh ṭhat avangin kum kal ta chhungin dan leh thupek kenkawh kawngah harsatna lian tham a thleng lo.

Mizoram leh Assam inrina lai hmun ṭhenkhatah buaina tênau a chhuak a, police-te'n rang takin an hmetmit zel. State pahnih sorkar aiawhte'n August 5, 2021-ah thuchhuah inṭâwm an siamah Home Ministry, Mizoram leh Assam chief minister-te'n ramri buaina chinfel a nih theihna tura hma an lak mek chu Mizoram sokar leh Assam sorkarin ṭha an ti. Ramri hrûlah boruak ralmuang a awm thuai ṭha tiin ramri chungchangah inremna a awm theih nan thu inchuh chu dawhkan kilhoa sawiho ni se, tih a ni.

CM Zoramthanga chuan, sorkar flagship programme sawiin, "SEDP hnuaia ruahmanna awm saa hmalakna turin Planning department-in kum 2020-21 chhungin department hrang hrangah cheng vbc. 99.61 a pe. 23% chu kawngpui siam nan a ni a, hriselna lama hmalak nan 19%, in sak nan 16%, Aviation tan 13%, zirna atan nan 8%, agriculture leh a kaihhnawih atan 7%, energy sector atan 4%, water & sanitation sector atan 2%, rural development atan 1% a ni a, a la bâng 7% chu department-ah sem darh a ni," a ti.

Aizawla Independence Day lawmnaah hian parade an awm lo a,. guard of honour pe tur armed force contingent panga - 2nd Bn Assam Rifles, 90 Bn. BSF, 3rd Bn. MAP, 5th IR Bn. leh Mizoram Home Guards leh band party pakhat - 1st MAP Brass Band an tel.

Chief Minister hian police leh zirtirtu chawimawina hrang hrang dawngtute hnenah lawmman a hlan a ni.