KHAWTHLIR

C Lalrosanga tel
Young Men's Christian Association (YMCA), New Delhi leh Indian Christian Parliamentarians Council chuan tun hnai khan Kristian MP-te tan felicitation programme an buatsaih a, Kristian MP zingah Lok Sabha MP aiawhin C Lalrosanga leh Rajya Sabha MP aiawhin KJ Alphons an tel. C Lalrosanga chuan, Kristian MP-te'n an mawhphurhnate Parliament-ah ṭha taka an hlen theih nan anmahni finchhuah a, thuràwnte pe ṭhin turin YMCA hotute leh kohhran hrang hrang hruaitute a ngen. Lok Sabha leh Rajya Sabha term kal mekah hian MP zingah Kristian 22 an awm mek.

Ei-in tur sem
AMC leh Aizawl DC-te ruahman angin AMC Ward-XIV chhunga lirthei khalh leh enkawl hmanga eizawng mi 53 hnenah bialtu councillor Ramthanzauvi chuan August 14, Inrinni khan buhfai, dailuah, tél leh thil dangte a sem.

I-Day-ah hripui vei
Nimina Lammuala Independence Day lawmnaah chief minister Zoramthanga'n chawimawina hrang hrang a hlan turte chu Rapid Antigen Test hmangin an swab sample endik hmasak vek a ni. An zinga Vairengte aṭanga kal police pakhat chu Covid-19 positive a nih tih hmuh chhuah a ni a, hei vang hian award hlan a ni ve rih lo.

ASF ṭanpuina
Aizawl North-I bialtu MLA Vanlalhlana chuan August 13, 2021 khan a bial chhung a tlawh a; Durtlang North-a African Swine Fever vanga vawk thite tlawmngaih chhuaha a thlàwna phûmsak ṭhintute - 'Vawk vulhtute ṭhian' hnenah a ṭula an hman atan Rs. 5,000 a pe. A biala damlo leh Covid-19 vanga hna thawk thei lote hnenah ṭanpuina sum a pe bawk.

Gauhati HC-ah Independence Day
Nimin khan Gauhati High Court, Aizawl Bench-ah Independence Day vawi 75-na lawm a ni a, Justice Michael Zothankhuma'n hnam puanzar a pawtpharh a, 225 Bn CRPF-ten hnam puanzar chibai an bûk a chháng lêt. I-Day lawmnaah hian Hermon Children’s Home, Special Blind School leh Gan Sabra aiawhte sawm an nih angin an tel a ni.