Hripui donaah sorkar chêt dan avangin Mipuiah tawrhna a thleng mek - MPCC

Mizoram Pradesh Congress Committee (MPCC) Media depart­ment chuan, Inrinni khan Aizawl Press Club-ah thuthar thehdarhtute an kâwm a; Covid-19 donaa Mizoram sorkar an duhkhawp lohnate sawiin, "Sorkar thil tih duh dan avangin mipuiah tawrhna a thleng a ni," a ti.

MPCC Media chairman Dr Lallianchhunga chuan, Covid-19 donaah an party-in a tìr aṭangin sorkar an thlàwp ṭhin thu sawiin, "Sorkarin 'Inbeih hun a ni lo, ṭanrual hun a ni e' an tih fo angin sorkar bei loin, thil ṭha duhna avangin rawtna vawi eng emaw zat, meeting kaltlangte, media kaltlangte pawhin kan thlen ṭhin," a ti a; mahse, sorkarin eptu party-te a thawhpui ṭha duh lo niin a sawi.

Dr Lallianchhunga chuan, chawmdawlna lamah sorkarin hmalakna a nei lo tih sawiin, "Khawvela lockdown puang rei ber leh puang zing ber kan nih avang leh second wave-ah pawh lockdown ni 100 chuang kan puan tawh avangin mipui tawrhna a nasa hle. Mi tam tak eizawnna a buai a, chhawmdawl ngai chhungkaw sang tam tak an awm phah a ni," a ti.

Chhawmdawlna atan sorkarin cheng khat pawh a hmang duh lo tih sawiin Lallianchhunga chuan, "Congress party-in mi harsate chhawmdawlna tur lian tham state budget aṭanga siam tura sorkar vawi tam tak kan ngennain awmzia a nei lo," a ti a; sorkar aṭanga chhawmdawlna pek chu CM Relief Fund aṭangin a ni a, sorkar sum hman a la nih loh thu a sawi.

Sorkarin Covid-19 leh RT-PCR a do kawp avangin mipuiin an tuar tih sawiin Lallianchhunga chuan, "Covid-19 do hi sorkar tih tur a ni a, RT-PCR a do leh zel hi mipui tan a pawi," a ti a; Mizoramin sample rintlak ber RT-PCR hman theihna laboratory pakhat chiah a neih thu a sawi.

MPCC Media Chairman sawi danin, April 7, 2020-ah NHM mission director Verdana Gurnani-in state tin health secretary-te lehkha a thawn a, ‘India Covid-19 Emergency Response & Health System Preparedness Package’ hnuaiah laboratory dinna tur te, laboratory awm sa tihchangtlunna turte ruahmanna engkim a awm thu tarlan a ni.

Package hnuaia hmalaknate chu sorkar laipuiin a tum vek tur a ni a, chuti chung chuan Mizoram sorkarin laboratory din belh lam a ngaihtuah duh lo. Lunglei Civil Hospital-a RT-PCR khawl bun a nih loh nan Gauhati High Court, Aizawl Bench-ah sorkar ukil ṭha ber ber hmangin theihtawp a chhuah a ni.

MPCC Media Chairman chuan, sample endik rûnpui an ti tlai nia sawiin, "Hei hi Mizorama hripui darh vak chhan pakhatah kan ngai. June 7, 2021 khan MPCC president Pu Lal Thanhawla’n mass testing neih a rawt tawh. Kan rawtnate sorkarin ngaithla se, nikum aṭang khan district hospital tinah RT-PCR lab. din belh se, test tam zawk hi RT-PCR hmanga test ni se tun dinhmun hi kan thlen a rinawm loh," a ti.

RAT chu 50% vel chiah a rintlak tih mithiamte'n an sawi tih tarlangin Lallianchhunga chuan, "Central sorkar pawhin sample test zinga 70% tal RT-PCR hmanga test tur a ti hial a ni," a ti a; Mizoramah chuan MNF sorkarin RT-PCR lab. a din belh duh tlat loh avangin RAT hman loh theih loh a nih thu a sawi.

MPCC Media hotute chuan, Covid thawh khatnaah kan tawrh nat loh avangin sorkar a inthlahdah niin an tarlang a; health infrastructure tihhmasawnna lamah sorkar laipui a inhuam thui tih sawiin, "A thlawn vekin central sorkar aṭanga hmuh theih a ni," a ti.

Mizoram sorkarin Covid-19 donaa a tih fuh tâwk lohte enin Health minister Dr R Lalthangliana chuan a mawhphurhna a hlen zo lo hle a ni tih a inpawm a hun tawh hleah an ngaih thu an sawi a; "Mipui zah lo taka ṭawngkam chhâk chhuaktu Sports Minister hian ngaihdam a dil ngei turah kan ngai," an ti bawk.

Dr Lallianchhunga chuan, sorkar, political party leh NGO inràwnkhawmna mualphona tur thup nan a hming lekin party-te koh an nia sawiin, "Rawtna kan thlente bawhzui a ni ngai lo. Eptu party kan nih angin hripui donaa sorkarin mipui beisei a phak loh dan au chhuahpui hi a hun tawhin kan hria. Sorkar thil tih duh dan vanga mipui tawrhna thleng mek hi ngawih bopui chi-ah kan ngai tawh lo a ni," a ti.

MPCC Media chuan chief minister Zoramthanga'n Khedacherra-Damcherra-Zamuang-Kawrthah-Tuilutkawn kawng siam zawh a nih hma-a a hawng chu mak an tih thu an sawi bawk.