Hripui vanga thi 5 awm belh

August 14, Inrinni leh nimin khan Covid-19 vanga thi mi panga an awm belh a, nimin tlai dar 5 thleng khan Mizoramah hripui vangin mi 181 an thi tawh.

Sorkar chhinchhiah angin, nimin tlai dar 5 thleng khan thla kal mek, August 2021 bikah Covid-19 vangin mi 33 an thi tawh. Nikum October thlaah mi pakhat, November-ah mi panga leh December-ah mi pahnih an thi a; kumin 2021 January, February leh March thlaah mi pakhat ṭheuh, April-ah mi pali, May-ah mi 25, June-ah mi 53, July thlaah mi 55 an thi a ni.

Covid-19 vangin mi 181 thi tawh
Covid-19 vei State Referral Hospital (ZMC)-a enkawl lai Magnath Rajbongshi (26), Lawipu, Aizawl chu August 13, Zirtawpni zan dar 9:30 khan a thi a, Inrinni khan vui a ni. Covid-19 positive a ni tih August 12 khan hmuh chhuah a ni a, SRH-ah dah luh nghal a ni.

Zirtawpni vek zan dar 10:50-ah VL Hmachhuana (61) h/o Lalramnghaki, Tuikual North chu Covid-19 vangin SRH-ah a thi a, Inrinni chawhma dar 10-ah vui a ni. Covid-19 positive a ni tih August 2, 2021 khan hmuh chhuah niin, SRH-ah enkawl nghal a nih thu sorkar thuchhuakin a tarlang.

August 14, Inrinni zing dar 6:45 khan Baby Lalngaihzuali (35) w/o Lalengzuala Renthlei, Republic Vengthlang chu hripui vangin SRH-ZMC-ah a thi a, chhunah Republic Vengthlang Baptist Kohhran Hall-ah vui a ni. Amah hi SLE natna nei sa a ni a; hripui vei a ni tih July 31-ah hmuh chhuah a ni.

Inrinni vek chhun dar 12:10 khan Lalnunsiami (58), Zuangtui chu SRH-ZMC-ah a thi. Covid-19 positive a ni tih July 28, 2021-ah hmuh chhuah a ni a, July 31-ah SRH-ZMC-ah admit a nih thu sorkar thuchhuakin a tarlang.

Hripui vei enkawl lai PC Chuaukunga (40), Durtlang North pawh Inrinni zan dar 11:50 khan SRH-ah a thi a, nimin khan vui a ni. Covid-19 vei a ni tih August 6, 2021 khan hmuh chhuah a ni a, SRH-ah enkawl nghal a ni.

Nimin zing dar 3:25 khan R Sangṭhuama (83) h/o Thanchhungi (L), Electric Veng, Aizawl chu SRH-ah a thi a, nimin chawhma dar 11 khan Electric Vengthlang Kohhran biak-inah Aizawl Central Presbytery Moderator-in a vui. Amah hi Covid-19 vei a ni tih July 28 khan hmuh chhuah a ni a, SRH-ah enkawl nghal a ni.

Nimin vek zing dar 9 khan C Vanlalhluni (63), Saikhamakawn chu hripui vangin SRH-ZMC-ah a thi a, hripui vanga thi 181-na a ni. Covid-19 positive a ni tih July 28 khan hmuh chuuah niin, July 30 aṭangin SRH-ZMC enkawl a nih thu sorkar thuchhuakin a tarlang.