Hmun hrang hrangah I-Day lawm a ni

Nimin khan Mizoram hmun hrang hrangah Independence Day vawi 75-na lawm a ni. Covid-19 léng avangin kumina Independence Day lawmnaah hian sàwm bik tlemtê chauh an tel a, mipui an tel lo.

LUNGLEI
Lungleiah chuan DC pisa tualah I-Day lawm a ni a, minister C Lalrinsanga'n hnam puanzar pawt pharhin, sipaite'n hnam puanzar chibai an bûk a chháng lêt.

I-Day lawmnaah hian Lunglei district-a sorkar sikul aṭanga HSLC leh HSSLC topper-te hnenah leh AB-PMJAY hnuaia damdawi-in ti ṭhate hnenah lawmman sem a ni. Damdawi-in lawmman hi sorkar damdawi-in Lunglei Civil Hospital leh mimal damdawi-in Christian Hospital-te'n an dawng.

SIAHA
Siahaah chuan Circuit House tualah lawm a ni a, minister of state Robert Romawia Royte-in hnam puanzar pawt pharhin, thuchah a sawi.

I-Day lawmnaah hian khuallian chuan Siaha District Hospital hnenah ABPM-JAY certificate of appreciation a hlan a ni.

CHAMPHAI
I-Day hi Champhaiah chuan DC bangla tualah lawm a ni a, minister of state TJ Lalnuntluanga khuallian a ni. Independence Day lawmna hunah hian Champhai district-a ABPM-JAY kalpui ṭha damdawi-in thlan chhuah, Champhai District Hospital leh Med-Aim Adventist Hospital-te hnenah chawimawina hlan a ni.

KOLASIB
Kolasib-ah chuan minister of state K Lalrinliana hoin DC pisa tualah I-Day lawm a ni a, hnam puanzar a pawt pharh. Kolasib district-ah hian Kawnpui SDO (Civil) office, Thingdawl BDO office, Bairabi SDC office leh Vairengte SDO(C) office-ahte pawh I-Day lawm a ni.

SERCHHIP
Serchhipah chuan damdawi-in, home, special school leh jail-ahte thilpek hlan a nih hnuah a lawmna pui ber DC pisa tualah hman a ni a, govt. dy. chief whip Lalrintluanga Sailo, MLA-in hnam puanzar a pawt pharh.

Khuallian hian kumina HSLC leh HSSLC exam-a Serchhip district aṭanga top 10-a tlingte hnenah leh a tiṭha zual sikul panga hnenah Beti Bachao Beti Padhao kaltlangin lawmpuina thilpek a hlan. SBI Foundation-te'n CSR hmanga Serchhip district tana ambulance an pek chu regional manager LP Lalchangkima'n CMO Dr Laldawngliana Sailo hnenah a hlan bawk.

LAWNGTLAI
Lawngtlaiah chuan Lawngtlai East bialtu MLA H Biakzauva hoin Central YLA playground-ah lawm a ni. I-Day lawmnaah hian Lawngtlai district-a HSSLC topper leh ABPM-JAY hnuaia damdawi-in ṭha thlante hnenah lawmman hlan a ni a; damdawi-in ṭha lawmman dawngtute chu Lawngtlai District Hospital leh Lairam Christian Medical Centre & Hospital-te a ni.

MAMIT
Mamitah chuan Assembly speaker Lalrinliana Sailo hoin DC pisa tualah I-Day lawm a ni. Speaker hian I-Day lawmnaah hian ABPM-JAY hnuaiah Mamit District Hospital hnenah chawimawina a hlan a, district hospital leh jail hnenah thilpek a hlan bawk.

SAITUAL
Saitualah chuan Saitual College kawtah lawm a ni a, minister R Lalzirliana'n hnam puanzar pawt pharhin, 2nd IR Bn, Khawzawl leh Mizoram Home Guards & CD band party-te'n hnam puanzar chibai an bûk a chhang lêt.

Khuallian hian Saitual district-a zirtirtu ṭha leh zirlai ti ṭhate hnenah chawimawina thilpek a hlan a ni.

KHAWZAWL
Khawzawlah chuan DC pisa tualah lawm a ni a, minister of state Lalchhandama Ralte-in hmanpuiin, 2nd IR Parade Contingent-ten hnam puanzar chibai an bûk.

I-Day lawmnaah hian bialtu MLA Tawnluia'n a bial chhunga zirlai ti ṭha zual mi 13 hnena lawmpuina thilpek a pek chu khuallian hian a hlan. MLA pahnih C Lalmuanpuia leh Lalrinsanga Ralte ten Khawhai PHC leh Sialhawk PHC-a hman tura bialtu MLA-in ambulance a ngaihtuahte chu medical officer-te hnenah an hlan bawk.

HNAHTHIAL
I-Day hi Hnahthialah chuan DC pisa tualah lawm a ni a, minister Dr R Lalthangliana'n hnam puanzar pawt pharhin, 2nd Bn. MAP-te'n zahna chibai an bûk a chháng lêt.

I-Day pual hian Jehova Jire Home leh Hnahthial District Hospital-ah Rs. 2,000 ve ve pek a ni a; infiamna lama Hnahthial district tihmingṭhatu mi pali hnenah chawimawina hlan a ni bawk.