Independence Day pualin thilpek hlân

Aizawl DC Dr Lalhriatzuali Ralte chuan nimin khan Govt.Complex venga State Senior Citizens Home leh Hunthar Venga State Social Welfare & Rehabilitation Centre-te a tlawh a, Independence Day pualin thilpek a hlân.

Dr Lalhriatzuali Ralte chuan, Rehabilitation Centre-a enkawl mek hmeichhiate chu mi puitling leh rintlaka inchher chhuak vek tur leh rilru insiam thara ṭan la sauh sauh turin a fuih.

State Senior Citizens Home-ah hian kum 60 chung lam mi pariat leh special case-in kum 60 hnuai lam mi pakhat, an vaiin mi pakua an awm mek. Home hi Old Age Home tih hming puin Mission Vengah mi in luahin kum 1989-ah din a ni a, Durtlangah sawn a nih hnuah tuna a awmna, Govt.Complex-ah kum 1996 khan an awm ṭan a; thawktu pakua an awm mek. Din a nih tirh aṭangin mi 72 enkawl an ni tawh a, chung zinga mi 32 chu an thi tawh.

State Social Welfare & Rehabilitation hi zu leh ruih theih thila harsatna nei hmeichhiate enkawlna hmun a ni a, October 8, 1990-ah din a ni. Centre-ah hian eizawnna atana thiamthil chi hrang hrang - puanṭhui, puantah, beauty culture leh computer (BCC) zirna kalpui a ni.

Aizawl DC pisaa thawktute dangte pawhin nimin khan I-Day pualin Centre for Peace & Development, Special Blind School, Hermon Children's Home, Friends of Children, Khawngaihna In, Bethany Children's Home, Muanna In leh Hmangaihna Rûnte tlawhin thilpek an hlan bawk.