Ni hnih chhungin hripui vei Mi 991 hmuh chhuah a ni

Mizoramah Covid-19 vei August 13, Zirtawpniah mi 524 leh August 14, Inrinniah mi 467 hmuh chhuah a ni a, ni hnih chhunga hmuh chhuah hi mi 991 an ni. Inrinni leh nimin khan hripui mi laka fihlim tawh mi 1,609 chhuahtir an ni a, hripui vangin mi panga an thi.

Covid-19 vei August 13-a hmuhte chu mipa 237 leh hmeichhia 287 an ni a; ZMC laboratory-a hmuh chhuah pali, TrueNAT hmanga hmuh 28, RAT hmanga hmuh 489 leh Fluorescent Immunoassay (FIA) hmanga hmuh pathum an ni. Inrinnia hmuh chhuahte chu mipa 239 leh hmeichhia 228 an ni a; ZMC-a hmuh 24, TrueNAT hmanga hmuh 35, RAT hmanga hmuh 400 leh FIA hmanga hmuh pariat an ni.

IDSP record angin, Mizoramah Covid-19 vei 48,462 hmuh chhuah a ni tawh a, mipa 25,148 leh hmeichhia 23,314 an ni. Nimin tlai dar 5 thleng khan mi 38,288 (79%) chhuahtir an ni tawh a, mi 181 (0.37%) thi tawhin, enkawl mek mi 9,993 (20.63%) an awm.

August 13, Zirtawpnia swab sample endik dan chu - ZMC laboratory-ah 87, TrueNAT hmangin district pakuaah 285, RAT hmangin district 11-ah 14,613 leh FIA hmangin Aizawlah 35 a ni a, a vaiin sample 15,020 niin, ni khata sample endik tam ber ṭum a ni.

Sample endik 15,020 aṭanga hripui vei hmuh chhuah 524 chu 3.48% a ni a, hun rei tak chhunga positive percentage a hniam ber ṭum a ni. Positive percentage hi ZMC-ah 4.59, TrueNAT-ah 9.82, RAT-ah 3.34 leh FIA-ah 8.57% a ni.

Hripui vei hmuh thar mi 524-te chu symptom nei 339 leh nei lo 185 an ni a; tualchhunga kái 519 leh state pawn aṭanga tun hnaia rawn lut panga niin, tualchhunga kái zingah kàina chin hriat loh mi 244 an awm. Nausen kum khat tling lo 11 telin, an zinga a tam zawkin symptom an nei a; kum 90 chung lam pahnih an awm bawk.

August 14, Inrinnia sample endik dan chu - ZMC laboratory-ah 243, TrueNAT hmangin district 10-ah 250, RAT hmangin district 11-ah 6,594 leh FIA hmangin Aizawlah 128 a ni a, a vaiin sample 8,772 niin, chu'ng aṭanga hripui vei hmuh chhuah 467 chu 5.23% a ni. Positive percentage hi ZMC-ah 9.87, TrueNAT-ah 14.00, RAT-ah 4.90 leh FIA-ah 6.25% a ni.

Hripui vei hmuh thar mi 467-te chu symptom nei 274 leh nei lo 193 an ni a; tualchhunga kái 464 leh state pawn aṭanga tun hnaia rawn lut pathum niin, tualchhunga kái zingah kàina chin hriat loh mi 242 an awm. Nausen kum khat tling lo pali telin, an zinga pahnihin symptom an nei a; a upa ber kum 78 mi pawhin symptom a nei.
August thlaa ni 10 chhungin Mizoramah Covid-19 vei mi 9,538 hmuh chhuah a ni tawh a, chawhrualin ni tin mi 681.29 hmuh chhuah an awm ang a ni. Mizorama Covid-19 vei hmuh tawh zat 48,462 chu kum 2011 chhiarpui angin, Mizorama mi 1,000 zelah hripui vei mi 44 an awm ang a tling.

Nimin khan tlai dar 5 thlengin hripui laka fihlim tawh mi 662 chhuahtir an ni a, Inrinni khan mi 947 chhuahtir an ni.