Building ṭha aiin damdawi-in chhunga thawh ṭhat a pawimawh zawk - Health Minister

Health minister Dr R Lalthangliana chuan, damdawi-in building ṭha aiin damdawi-in chhunga ṭha taka thawh a pawimawh zawk tih a sawi.

Dr R Lalthangliana chuan August 14 khan South Vanlaiphai damdawi-in (PHC) thar, NABARD sum cheng nuai 140 hmanga sak a hawnnaah thu sawiin, "Health department hian a tum ber chu mi nunna chhan theih nana hmalak a ni a, mite hriseltir hi a tum ber chu a ni. Hospital building ṭha tak neih aiin a chhunga ṭha taka service hi a pawimawh zawk a ni," a ti.

Dr R Lalthangliana hian S Vanlaiphai bakah, Darzo, New Kawnpui, Lungpuitlang leh Muallianpui khuate tlawhin, sorkar official-te leh khawtlang hruaitute thil pawimawh a sawipui a; Covid-19 leng thawh khatna chhungin Mizoramah mi 10 vel âwrh chauh an thih laiin, a thawh hnihnaah chuan mi 170 chuang an thih tawh thu a sawi.

Covid-19 thawh thumna pawh thleng leh theih a nih thu leh mithiamte chuan naupang zawkte'n an tuar nasa dawn nia an sawi avangin kawng hrang hrangin an inbuatsaih lâwk tih sawiin Minister chuan, "Engtikah emaw chuan Covid hi a la reh ang a, Pathian hnenah ṭawngṭai báng lo ila, a hlawhtlinna kan la hmu ang. Covid chungchangah hian rorel thiam a har hle a ni," a ti.