Lottery distributor term chungchangah Sorkarin thutlukna a la siam lo
Mizoram sorkar chuan lottery kalpui chhunzawm zel turin distributor ngaite term a pawtsei dawn nge, tender a chhuah thar dawn tihah thutlukna a la siam lo.
Vanglaini thu dawn danin, Mizoram sorkarin lottery distributor atana a hman mek firm-te term chu May 28, 2018-ah a tawp dawn.
Mizoram sorkar chuan Mizoram State Lottery Committee (MSLC) chu distributor-te term pawhsei tur nge, tender a thara chhuah tur tihah thutlukna siam turin a hriattir a ni.
MSLC-ah hian Chief Secretary chu chairman a ni a, member secretary chu IFSL Director niin, member dangte chu Finance Secretary leh Law & Judicial Secretary-te an ni.
MSLC hi February 14, 2018 khan ṭhukhawm tur an ni a, mahse, Chief Secretary a remchan loh avangin an ṭhukhawm thei lo.
Tuna Mizoram sorkar hnuaia lottery buaipui mektute chu - online lottery-ah NV International, Summit Online Trade Solutions leh E-Cool Gaming Solutions an ni a; paper lottery-ah Testa Distributors a ni.
Firm palite hi Mizoram sorkar chuan lottery buaipui turin May 18, 2012 khan tender kaltlangin a thlang a; an term hi ṭum thum a pawhseisak tawh a, a pawhsei hnuhnun berah May 29, 2015 - May 28, 2018 chhung atan pawhsei a ni.
Mizoram sorkar hnuaia lottery distributor-te hian tun dinhmunah West Bengal, Maharastra, Punjab leh Sikkim-ah lottery an zuar chhuak mek a; Mizoram bikah chuan lottery ticket hralh a kal loh avangin kum 2012 aṭang khan ticket zawrh chhuah a ni tawh lo.
Mizorama lottery distributor-te hi Kerela-ah pawh luh an tum a, mahse, Kerela sorkar Supreme Court-ah a kal avangin an lut thei rih lo. Supreme Court hian February 2018 tir khan thutlukna siam a tum a, mahse, Kerela sorkar ukilte'n hun an dil belh avangin thutlukna siam hun sawn a ni.