MJA-in Book Donors' Meet huaihawt tum

MJA Public Library Sub-Committee chuan March 15, 2018 khian Aizawlah MJA Public Library-a a thlawna lehkhabu petute hnena lawmthu sawina leh intawh khawmna atan Book Donors' Meet huaihawt an tum a; MJA Library tana lehkhabu petu zawng zawngte tel turin an sáwm.

MJA Public Library Committee chuan thuchhuah siamin, MJA Public Library-ah lehkhabu 5,211 a awm mek tih an tarlang a; lehkhabu zinga tam tak chu lehkhabu ziaktu/buatsaihtute'n a thlawna an pek a nih avangin, lehkhabu petute chungah an lawm tak zet tih an sawi.

Lehkhabu petute address hriat vek theih a nih loh avangin hriattirna leh sâwmna lehkha thawn chhuah kawngah harsatna a awm tih sawiin, lehkhabu petute hriatthiamna an ngen a; MJA Public Library tana a thlawna lehkhabu petu, Donors Meet-a tel thei turte chu phone no. 9436141035 / 8794665730 / 8794665730 / 7005705884 / 9862836781 leh Aizawl Press Club-ahte March 5, 2018 ral hmaa inhriattir turin an ngen a ni.

MJA Public Library Committee chuan, MJA Library-ah hian lehkhabu hlu tak tak, State Legislative Assembly Proceedings thlengin a awm tih sawiin, "Research scholar tan pawha chhenfâkawm tak a nih avangin MJA Library hi chhawr ṭangkai turin MJA chuan mipui a ngen a ni," an ti.

Thuchhuhin a tarlan danin MJA Public Library hi chawlhkar tin Thawhṭanni aṭanga Zirtawpni thleng Aizawl Press Club, Teasury Square-ah tlawh theih a ni a, member a nih theih reng a ni.