Ramngaw inhlan let dan tur sawiho

Nimin khan Lawngtlai DC Dr Arun T pisa-ah, PCCF (Wildlife) Rosiama Vanchhawng hoin Mizoram sorkarin Lai Autonomous District Council (LADC) huam chhunga ramngaw (protected area) a enkawl­te LADC kuta hlan dan tur sawiho a ni.

Mizoram sorkar Environnment & Forest department-in LADC huam chhunga awm, Phawngpui National Park leh Ngengpui Wildlife Sanctuary-a enkawl mekte chu September 2018-ah LADC hnenah hlan let tum a ni a; chuta tana hmalak dan turte sawiho a ni.

Meeting-a tarlan danin, LADC chhunga protected area-te hi kum 1983 khan Mizoram sorkar leh LADC inrem­siamna angin Mizoram sorkarin kum 25 chhung atan a enkawl ṭan a; kum 2008 khan inremsiamna chu kum 10 atan pawhsei leh niin, September 2018 aṭang chuan LADC kuta hlan lêt tura ruahman a ni.

Meeting-ah hian, March 13, 2017 aṭanga Lungzarh­ṭum khaw ram Tlangpui hmuna ramsial chhuak, tun thlenga bawng rual zinga la khawsa mek chungchang leh buaipui zui dan tur pawh an sawiho bawk.

Wildlife lam hotute chuan, an record neih saah a anpui dang an hmuh loh avangin ramsial chu eng chi ber nge a nih hriat chian theih a la nih loh thu an sawi a, "A êk aṭanga DNA test tih tawh a ni a, a chi dik tak hre chiang thei tur chuan a thisen aṭanga DNA test a ngai a, chu chu tih theih a la ni lo," an ti.