KHAWTHLIR
Pisa kai hun
GAD chuan thuchhuah siamin, Mizoram sorkar hnuaia thawkte tan vawiin aṭanga hman ṭan tur pisa kai hun a siam thar. Sorkar pisa kai hun hi vawiin aṭang chuan Mizoram leh hmarchhak state-a Mizoram House-ahte zing dar 9 aṭanga tlai dar 5 thleng a ni dawn a; New Delhi, Kolkata Mumbai leh Bengaluru-a Mizoram House-ah chuan zing dar 9:30 aṭanga tlai dar 5:30 thleng a ni ang.
Tlan khap
Traffic SP C Lalthanmawia chuan thupek chhuahin, SIPMIU-in Chite lei bulah sewarage pipe line phûm hna February 17-20 chhungin zing dar 9 aṭanga tlai dar 5 inkarah an thawh dawn avangin, hna thawh hun chhungin lirthei tlân theih a ni dawn lo tih a puang.
Ambulance hlan
Power Grid Corporation of India (PGCI) chuan, corporate social responsibility (CSR) aṭangin nimin khan YMA sub-headquarters, Kolasib hnenah ambulance an pe a, inhlanna hun hi Power & Electricity secretary H Lalengmawia'n a hmanpui.
D.El.Ed result
Mizoram Board of School Education chuan vawiin chawhma dar 10 hian D.El.Ed semester examamination 2017 (December) result a tichhuak dawn a; MBSE pisa, Chaltlangah leh MBSE website www.mbse.edu.in-ah en theih a ni ang.
Lehkhabu thar
ICFAI University-a Department of English buatsaihin Dr. Easterine Kire lehkhabu, 'Don't Run My Love' tih chu nimin khan The Grand Hotel-ah tlangzarh a ni.
Zu zuar 31 man
Excise & Narcotics leh Police department chuan January 2018 chhung khan zu zuar 31, zu rûi 16, rakzu litre 567.15, sap zu (ûm puitling) ûm 177 leh hawn tawh ûm pahnih, zu sakna bel pathum an man a; zu kaihhnawihah lirthei pakhat an man bawk.