AMPO-in PHE pisa sak tum an sawifiah Sorkar quarters ṭhiah a ni dawn lo - AMPO

Association of Mizoram PHE Officers (AMPO) chuan thuchhuah siamin, New Secretariat Complex-a PHE Engineer-in-Chief pisa tur sak tum dodalna a awm leh chumi vanga thu dik tluantling lo vawrh darh a awm niin an tarlang a; PHE pisa sak tur vangin a bula sorkar quarters awm sa ṭhiah a ni dawn lo tih an puang.

AMPO tarlan danin, November 2013-ah New Secretariat Complex-a Plot No. B-17-ah ram square metre 975.16-a zau chu PHE department-a SE, S&S pisa sak nan pek a ni a, kum hnih chhunga sak ṭan tura tih a ni. Plot B-17 chhunga sorkar quarters pakhat, chhungkaw paruk luah lai awm chu ṭhiah tura tih a ni.

PHE pisa sakna turin sum a awm mai loh avangin kum hnih chhunga hna ṭan theih a ni lo tih sawiin AMPO chuan, "Chumi vang leh chhungkaw paruk luah mek quarters ṭhiah a ṭul bawk avangin January 30, 2015-a Site Selection Committee meeting chuan ngaihtuah ṭhat leh atan a dah ta rih a ni," an ti.

AMPO tarlan danin, June 9, 2015-ah Site Selection Committee meeting-in Plot B-17 chhunga PHE hnena ram pek tawh chu sorkar quarters awm sa ṭhiah ngai lo turin allotment hmasa tidanglam hlekin, Plot B-17 ṭhenkhat leh Plot B-19 chu PHE E-in-C pisa sak nan allotment pek ṭhat leh a ni.

PHE E-in-C pisa atana ram pek nawn leh hnuah hna ṭan tura hmalak a ni a, hmalak ṭan laiin New Secretariat Welfare Committee (NSCWC)-in sorkar quarters awm sa nen a inhnaih an tih avangin PHE building sak tur hi sût (cancel) turin sorkarah an thlen a ni.

July 14, 2017-a PWD, PHE, GAD leh NSCWC aiawhte Chief Secretary conference hall-ah an ṭhukhawm a, sorkar quarters awm sa ṭhiat loa a inkar ft. 10 tal ni turin PWD lamin ruahmanna siam ṭha turin thu an dah. Ruahmanna siamṭhat hnuah August 31, 2017-ah PWD, PHE, GAD leh NSCWC aiawhte an ṭhukhawm leh chuan ruahmanna thar chu an pawm a, 'Hmalak chhunzawm zel ni se,' tiin an rûl.

PHE E-in-C pisa sa turin hmalak chhunzawm a ni a, October 20, 2017-ah a lungphùm phùm niin, AMC aṭang pawhin in sak phalna lak a ni. AMPO chuan, "Quarters awm sa ṭhiah tumna a awm lo," an ti.