2017 chhungin TB vei 1,931 hmu chhuak

Kum 2017 chhung khan Mizoram pumah ngawr natna (tubercsulosis) vei mi 1,931 hmuhchhuah an ni a; TB leh HIV vei kawp mi 131 hmuhchhuah an ni bawk.

Tuberculosis (TB) enkawlna chungchangah February 14, Nilaini khan Aijal Club-ah review meeting neih a ni a, Health minister Lal Thanzara'n a hmanpui bakah, NHM mission director Dr Lalrozama pawh a tel. Meeting hi state TB officer Dr Vanlalfela'n a kaihhruai a, district tina TB officer-te an tel a ni.

Health Minister chuan, HIV/AIDS leh TB chu khawvelin natna a buaipui berte zinga mi, natna inkaihhnawih tlat a nih thu a sawi a, "Mithiamte'n jail tángte leh damdawia inchiu ṭhinte zinga HIV leh TB chungchang zirbingna an kalpui aṭanga an zir chhuah hmangin India rama TB natna zir chianna atana sum tumtu Central TB Division (CTD)-in hmalakna siam ṭhat an tum a ni," a ti.

Health Minister hian Central TB Division aṭanga Mizoramin medical mobile van a dawn a tlangzarh nghal. Mobile van-ah hian CBNAAT khawl (khâk endikna), air conditioner, generator, UPS, laptop, printer leh refrigerator-te a awm a; Mizorama TB veite rang leh awlsam taka hmuh chhuah an nih theih nana hman tur a ni.

Meeting-a an tarlan danin, January-December 2017 chhung khan Mizoramah TB vei nia rinhlelh mi 8,129 enfiah an ni a, chu'ng zinga mi 1,931 chuan TB an vei tih hmuhchhuah a ni. MDR-TB vei rinhlelh mi 2,568 zinga 68-in MDR-TB an vei a; TB-HIV vei kawp nia rinhlelh enfiah mi 1,725 zinga 131-in TB leh HIV an vei kawp tih hmuhchhuah a ni bawk.

Tun hmaa TB damdawi, chawlhkar khata vawi thum ei ṭhin chu sorkar laipui thu angin, ni tin eia thlak a ni a, October 2017 aṭanga kalpui ṭan a ni. Sorkar laipuiin kum 2025-ah TB ûmbo a nih theihna tura hmalakna pakhat atan TB vei zawng zawng hnenah ṭanpuina thla tin Rs. 500 pek tur pawh Mizoramah a taka kalpui turin ruahman mek a ni.