HSA-in fûr hmain lei/kawng siam an phût

Hmar Students' Association (HSA), Sinlung Hills Joint Headquarters, Mizoram chuan thuchhuah siamin, an tlangdung hnukpui ber leh innghahna ber, NH-150 kawnga Tuirini lei chim chu pawi an tih thu an tarlang a; lei chim ta emaw, a aiawh lirthei tlan theihna kawng ṭha kumin fur thlen hma ngeia siam turin Mizoram sorkar an phût.

HSA chuan, Tuirini lei chim vanga thi HC Lalfakzuala, Sesawng chu an sûn thu leh, hliam Laltleipuia Hmar pawh dam zel tura an duhsak thu an tarlang a, "Fûrpui lo thlen hma ngeia lei hi siam ṭha leh turin sorkar thuneitute kan ngen," an ti.

Tuirini lei chu kumin fûr thlen hmaa dawh zawh hman a nih dawn loh chuan, fûr chhunga ei leh bâr châwk luhna tur leh zirlai leh zirna in hrang hrangte leh kawng engkimah hmar tlangdung mipuiin harsatna an tawh loh nan, a thlakna tur kawng (alternative road) siam turin sorkar thuneitute an phut a ni.

HSA chuan, NH-306A, New Vervek via Sakawrdai, Zohmun, Mauchar, Saiphai Bagha kawng chu kawngpui pawimawh a ni tih sawiin, "Serchhip leh Champhai district mipuite'n Aizawl traffic tibuai lo leh kawng chêp tak kara inhnawh buai ṭalh ngai loa supply engkim lakna atan by-pass road pawimawh tak a nih dawn avangin, a rang thei anga hma min laksak turin sorkar thuneitute kan ngen bawk," an ti.