'Barh luih ramri' lehkhabu tlangzarh a ni : Tihtakzeta ramri chinfel tum an la awm lo - Lalduhoma

ZPM party leader Lalduhoma, MLA lehkhabu ziah, 'Barh luih ramri' tih chu nimin khan ZPM Legislature Party leader Vanlalhlana'n Assembly Annexe-a ZPM Recess Room-ah a tlangzarh. Lalduhoma chuan, Mizorama sorkarna chelh tawh zingah tihtakzeta ramri chinfel tum an la awm loh thu a sawi.

Lehkhabu tlangzarh inkhawm hi ZPM vice president K Sapdanga'n a kaihruai a; tlangzarhtu Vanlalhlana chuan, tun hnaiah Mizo mipui zingah ramri ngaihtuahna a nasat thu sawiin, "Kan ramri hi a la chiang lo. Ziakin awm mahse tihfel a la ni lo. Ramri hi hriat chian a ngai em em a, kan history pawh chhui lêt a ngai a ni," a ti.

Vanlalhlana chuan, Cachar phaizawl luah hmasatute chu Zo hnahthlakte an nih thu sawiin, "Pém reng an nih avangin tute nge an hriat tawh loh mai a ni. Ramri hi rîn ṭhat rîn ṭhat a ni," a ti a; Bengal Eastern Frontier Regulation (BEFR), 1875 bak chu Mizote'n ramria an hriatpui loh a nih thu a sawi.

Lalduhoma chuan, kum 9 kal ta khan 'Barh luih ramri' tih lehkhabu tlangzarh a nih tawh thu sawiin, "Thil thleng dangte a awm avangin ennawn a ṭul a, ennawna chhuah ṭhat leh a ni. Ramri-ah mithiamte'n dik chiah si loa an ziak leh sawi a awm hian mipui rilru a hruai kawi thei. Uluk takin ka zir chiang a, a dik chin inngahna tlakte ka ziak a ni," a ti.

BEFR, 1875 chu Mizo lalte leh Britain-in independent ram an nih ve ve laia ramri an siam a nih thu sawiin Lalduhoma chuan, "Pillar (ramri lungphun) 46 a awm. Keini tan chuan vernacular boundary a ni," a ti a; kum 1904, 1912, 1930 leh Assam-in innghahna atana tunlaia an hman 1933 ramri chu Mizote tel ve lohna leh hriatpui loh barh luih ramri a nih thu a sawi.

ZPM Leader chuan, Mizoram leh Assam ramri tihchianna atan satellite hmanga endik turin NESAC hman tum a nih thu sawiin, "Satellite hmang hian kum 1993 boundary chauh teh a nih chuan keini tan pawm theih a ni lo. Kum 1875 chiah teh a nih pawhin Assam tan pawm chi a ni lo. Kan tlawhchhan ve ve an en chiang turah ka ngai," a ti.

Ramria ṭan chhan tur thu sawiin Duhoma chuan, "Kan ṭan chhan tur chu BEFR 1875 a ni. Kan ramri hlui neih lêt kan duh thu te, kan ram eng emaw zat kan chàn tawh thu te, 1933 chu kan hriatpui loh thute kan sawi ang," a ti a; kum 1933 ramri chu MIzote hriatpui loh, chhinchhiahna pawh awm lo a nih avangin ramri rîn ṭhat leh chu Mizote thupui ber tura a ngaih thu a sawi.

Lalduhoma chuan, ramri chu inbiakna hmanga chinfel a ngaih thu sawiin, "Ramria boruak a awm a, ramri chingfel si loa status quo hmanga tihtawp leh ringawt hi a ṭha lo. Kan sorkar neih tawhte hian ramri chinfel aiin, an sorkar chhunga ramri buai loh dan tur chiah an ngaihtuah. Tih tak zeta ramri chinfel tum an la awm lo," a ti.

ZPM Leader chuan, Mizoram chu state a nih hnuah ṭhenawm state-in Mizoram an luah reng tih sawiin, "Ramri hi ruling party chiah chinfel chi a ni lo. Mizo mipui huap boundary commission nghet tak din a ngai," a ti a; Mizo mipui lungawina ngeia ramri chingfel tura hmalak a ṭul thu a sawi a ni.