Kan hmalaknain rah ṭha a chhuah ṭan - Health Minister

Mizorama Covid-19 first wave chhunga Covid-19 vei zingah naupang kum 18 hnuai lam 11.46% an awm a, second wave-ah 28.48% an awm thung. Health minister Dr R Lalthangliana chuan, sorkar hmalaknain rah ṭha a chhuah ṭan nia a lan thu a sawi.

Nimin khan Health minister Dr R Lalthangliana hoin August 21, 2021 zanlai thlenga AMC huam chhunga partial lockdown leh Mizoram chhung hmun danga inkhuah­-khirhna kalpui dante thlirho a ni.

Health Minister chuan, total lockdown puan chhung leh partial lockdown puan chhungin Aizawl leh Mizoram hmun hrang hrangah Covid-19 inkai chhàwnna chhu chat turin theihtawp an chhuah niin a sawi a, "Sample test rûnpui hmun tam takah neih niin, emergency sample test pawh hmun eng emaw zatah hlawm lian deuhin kalpui a ni," a ti.

Hripui vei hmuh chhuah hma a, lâk hran zung zung tumin theihtawp an chhuah tih sawiin R Lalthangliana chuan, "Hei hian rah ṭha a chhuah ṭan niin a lang. Tun hnaiah hri kai thar zat a tlakhniam bakah ZMC leh hri kai enkawlna hmun hrang hrang phurrit pawh a zângkhai ta niin a lang," a ti a; inthlahdah palh erawh a hlauhawm thu a sawi.

Health Minister chuan, dinhmun ziaawm ṭanin lang mah se, fimkhur zual sauh sauh a ṭul hun lai a nih thu a sawi a, inthlahdah lo turin mipui a chah. Ṭhutkhawma IDSP nodal officer Dr Pachuau Lalmalsawma tarlan danin, Covid-19 first wave chhungin naupang kum 18 hnuai lam positive mi 513 an awm a, chu chu positive hmuh zawng zawng 4,476 aṭangin 11.46% a ni. Second wave-ah August 15, 2021 thleng kum 18 hnuai lam positive mi 12,529 an awm a, second wave bika positive hmuh zat 43,986 aṭangin 28.48% a tling.

Aizawl mayor Lalrinenga Sailo chuan, high court thutlukna anga Covid-19 vanga hnawmhnawk leh bawlhhlawh paih hun eng emaw chen a khaihlak chhungin ruahmanna an siam tih a sawi a, "Tunah chuan a paihna tur hmun kan nei tawh. Felfai takin ruahmanna siam a ni a, DCHC, CCC leh CCCC ṭhenkhatte bawlhhlawh paihna tur pawh a hmun hnaiah kan buatsaih," a ti.

Tarlan danin, SRH-ZMC-ah nimin chhun khan ICU khum 34 awm zinga 33 luah a ni a, ventilator mamawh mi 21 an awm. Ward hrang hrangah damlo leh anmahni awmpuitu mi 320 an awm mek bawk.

SEDP hnuaia siam oxygen plant 200 lpm chu tunah tihnun reng a ni a, PM Cares aṭanga hmuh 300 lpm pawh rim taka hman a ni. PM Cares aṭanga hmuh tho 1,000 lpm pawh a khawl dahna tur sakna bungrua ramri buai vanga Guwahati-a táng chu nimin khan Aizawl thlenpui a ni a, CPWD-te'n vawiinah bun hna an thawk ṭan nghal ang.

Ṭhutkhawmah hian DMR minister Lalchamliana, AMC mayor Lalrinenga Sailo, chief secretary Lalnunmawia Chuaungo, Aizawl City Local Council Association, Mizoram Kohhran Hruaitu Committee, Indian Medical Association leh NGO Coordination Committee hruaitute an tel a ni.