Myanmar aṭanga ni tin mamawh lakluh Chungchang Champhai DC hoin ngaihtuah

Champhai District Disaster Management Authority (DDMA) chu nimin khan bawrhsap Maria CT Zuali hoin DC pisa conference hall-ah an ṭhu a, DDMA member-te bakah, sorkar official, Assam Rifles, VC, YMA sub-hqrs. leh MJA hruaitute an tel. Myanmar aṭanga ni tin mamawh lâk luh chungchang an ngaihtuah.

Maria CT Zuali chuan, international border-te chu sorkar laipui thuneihna a nih avangin ramri kaltlanga bungraw lak luh leh hmalak chu sorkar laipui mawhphurhna a nih thu a sawi a; ni tin mamawh ei leh in tur lak luh kawngah ngaihtuahna fím tak sèn a ṭul thu sawiin, kal khawmte chu district kal zel dan tur ngaihtuah turin a sáwm a ni.

Ṭhutkhawmah hian Champhai district-ah Covid-19 vei an pun avangin fimkhur zual a ṭul hlea an hriat thu an sawi a; Health department hotute'n hripui veite kài dan, enkawlna leh vaccine pek dan dinhmun an tarlang.

Champhai DDMA member leh sàwm bikte'n Myanmar ramri kaltlanga ni tin mamawh ei leh in lak luh chungchanga ngaihdan leh thuràwnte an neihte an sawiho. Tualchhungah thlai leh chawhmeh tam hun lai a nih avang leh Mizoramah ni tin mamawh a luh ṭhat leh tawh avangin, tun dinhmunah chuan Myanmar lam aṭanga ni tin mamawh lak luh chu hripui lêng dinhmun thlirin insûm rih ni se, an ti.

Vegetables Supply Chain kaltlangin mamawhte ngaihtuah zel ni se, an ti a; ei leh bâra harsatna awm theite DDMA-in thlithlaiin, a ṭul chuan hmalak zel ni se, an ti bawk.

Champhai chief medical officer Dr R Lianmawia chuan, Champhai district-ah Covid-19 vei hmuh chhuah a pun nasat thu sawiin, ramri dep khua Zokhawtharah hripui vei an tam zual thu a sawi a; Covid-19 vaccine first dose la chu 70% an tlin tawh thu sawiin, "Second dose la erawh a tam rih lo," a ti.

District Hospital-a medical superintendent Dr Zatluanga tarlan danin, kumin June 21 aṭanga August 13 thleng khan District Hospital-a inentir leh lut turte RAT hmanga endikah Covid-19 positive 0.9% an awm a, August thla bikah 2.1% a ni. TrueNAT hmanga endikah chuan September 2020 aṭanga kumin August 13 thlenga endik aṭanga positive chu 8.8% a ni a, kumin August thla bikah 14.9% a tling.

Champhaia dedicated covid health centre - District Hospital-ah khum 20 awmnaah Covid-19 vei damlo 15 an awm mek a ni.