Hmasawnna hnathawh tur lung phûm

Sports & Yourth Services minister Robert Romawia Royte chuan nimin khan Lawngtlai College Venga Lawngtlai Residential Sports School sak bul ṭanna tur te, Lawngtlai Vengpuia field awm sa tihchangtlunna tur leh phûl lem phahna turte lungphùm a phúm.

Robert Romawia chuan, Lawngtlai district-in infiamna hmunhma ṭha a neih loh avangin Mizoram sorkarin a ngai pawimawh a, infiamna lama hmasawnna turin hmalakna lian tak tak ruahman a nih thu sawiin, "Mizoram sorkarin Covid-19 avangin sum leh paiah nasa takin harsatna a tâwk a, hetih laia central project hmanga Lawngtlai district-ah hmasawnna hna lian tak tak thawh a ni tur hi a lawmawm hle," a ti.

Sports Minister sawi danin, SYS department chuan Lawngtlai district-ah ṭhalaite hmasawnna atan cheng nuai 12,000 chuangin hna hrang hrang an thawk dawn a ni.

Pradhan Mantri Jan Vikas Karyakram (PMJVK) hmanga Lawngtlai district tihhmasawn dan tur tlangpui chu November 9, 2020-ah Chief Minister-in a puan tawh thu sawiin Robert Romawia chuan, "Hemi bawhzuiin sum sanction a ni ta a, first instalment pawh release a ni," a ti.

SYS director Lalsangliana tarlan danin, Lawngtlai Residential Sports School hi PMJVK scheme aṭangin cheng nuai 3,461.70 sênga sak tur a ni a, first instalment cheng nuai 1,557.77 dawn a ni tawh. Sikulah hian football field phûl lem phah, multipurpose hall, academic building, hostel pahnih, zirtirtu quarters leh principal quarters a awm dawn.

Lawngtlai Vengpui YLA Field tihchangtlunna leh phûl lem phahna atan hian PMJVK aṭang thoin cheng nuai 1,005.34 ruahman a ni a, first instalment sum hmuh tawh a ni.

Sports Minister hi Lawngtlai East bialtu MLA H Biakzauva, Lunglei South bialtu MLA Dr K Pachhunga, AMC councillor David Zohmangaiha leh Lawngtlai DC Dr Andrew H Vanlaldikate'n an ṭawiawm.