Covid MOT-te'n Lunglei an tlawh
Medical Operational Team on Covid-19 (MOT) member-te chuan an chairman Dr ZR Thiamsanga, MLA hoin nimin khan Lunglei district-a Covid-19 dinhmun tlangpui, hripui do lêtnaa hmalakna kal mek leh hmalakna atana ṭulte zirchiangin Lunglei an tlawh.
Covid MOT member Dr ZR Thiamsanga, Dr Lalhmuchhuaka, Dr Joel L Pautu leh Dr Don Halliday-te chu Lunglei District Task Force on Covid-19 member-te leh MLA ṭhenkhatte nen DC Conference Hall-ah an inkâwm a; MLA zingah Lunglei West bialtu minister C Lalrinsanga, Lunglei East bialtu Lawmawma Tochhawng leh Lunglei North bialtu Dr Vanlalṭanpuia te an tel. Official zingah DC Kulothungan A, SP Rex Zarzoliana Vanchhawng, CMO Dr LC Liana leh member dangte an tel a ni.
Inkawmhona kaihruaitu C Lalrinsanga chuan, Lunglei district-a sorkar lama mawhphurhna neitu te, task force te, pawl hrang hrang leh mipui thawhhona leh ṭanrualna azarah Covid-19 léngin ziaawm lam a pan mek tih a sawi.
Covid-19 MOT member-te chuan, Covid-19 hripui kian hun tur hriat a nih loh avangin zâwi zâwia nunphung pangngaia kîr a ngai tih an sawi a; hripui kaite hmuh chhuah hmaa enkawl hma a pawimawh tak zet tih sawiin, "Mi ṭhenkhat symptom nei, amaherawhchu test duh lo/ ngam lo, hriat chhuah hnua serious taka na ta an awm châwk a ni," an ti a, Covid symptom nei, a bikin khawsik, khuh leh thaw-hah neite chu inenfiahtir vat turin an ngen.
Covid MOT-te hian Lungleia veng ṭhenkhata village task force leh CCCC-te an tlawh nghal a ni.