Upa leh hmeithaite pension pawisa dawn tur K-deposit aṭangin pek chhuah a ni tawh

Social Welfare department (SWD) hnuaia pension hlawh la ṭhin kum 60 chin chung lamte leh hamṭhatna dawng ṭhin hmeithaite sum dawn tur chu hun eng emaw chen K-deposit-a dah a nih hnuah tun hnai khan pek chhuah a ni a; SWD chuan a dawng turte hnena pe chhuak turin hma an la mek.

Vanglaini-in thu a dawn danin, SWD hnuaiah kum 60 chin chung lamte'n hamṭhatna an dawn theih pension scheme - Indira Gandhi National Old Age Pension Scheme (IGNOAPS) leh hmeithai harsate'n hamṭhatna an dawn theih - Indira Gandhi National Widow Pension Scheme (IGNWPS) atana sum pek chhuahte Mizoram sorkarin K-deposit-ah hun eng emaw chen a dah avangin hun rei tak chhung pek chhuah theih a ni lo.

Tar pension scheme (IGNOAPS) hnuaiah hian kum 60-79 inkar hnenah pension Rs. 200 (central) leh Rs. 100 (state), a vaiin thla khatah Rs. 300 pek a ni a; kum 80 leh a chung lamte hnenah Rs. 500 (central) leh Rs. 100 (state), a vaiin thla khatah Rs. 600 pek a ni ṭhin.

Pension late hnenah hian October 2020 thlenga pek tur sum pek chhuah (release) a ni tawh a, state sorkar tum tur, mi pakhat tan Rs. 100 pawh September 2020 thleng daih sem tura pek a ni tawh.

November 2020 aṭanga March 2021 chhung atan sorkar laipui aṭangin sum hmuh a ni tawh a; sum chu Mizoram sorkar chuan K-deposit-ah hun eng emaw chen a dah hnuah tun hnai khan a pe chhuak a ni.

Hmeithai pension scheme (IGNWPS) hnuaia hamṭhatna dawngtute hnenah Rs. 300 (central) leh Rs. 100 (state), a vaiin Rs. 400 thla khat atan pek a ni ṭhin.

Hmeithai pension atan hian September 2020 thleng sum pek a ni tawh a, October 2020 leh March 2021 inkara pek tur sum chu central leh state aṭangin SWD-in sanction order an hmu tawh. K-deposit-ah hun eng emaw chen dah a nih hnuah tun hnai khan pek chhuah a ni.

SWD hotute hnen aṭanga thu dawn danin, K-deposit aṭanga sum pek chhuah a nih tâk avangin a dawngtu turte'n an dawn theihna atan hmalak nghal a ni.