KHAWTHLIR

Thisen pe
Model Blood Bank, Civil Hospital, Aizawlah nimin khan mi 96-in thisen an pe a; chu'ng zinga unit 88 chu pek bik nei leh rulhna (replacement) niin, a thlâwna pek (voluntary donation) unit 8 chiah a awm.

Oxygen bûr hlân
BJP, Mizoram Pradesh president Vanlalhmuaka chuan nimin khan Upper Republic LC, Vairengte Welfare Association, West Phaileng, Taitesena Group YMA leh Lungsen Welfare Association-te hnenah oxygen búr eng emaw zat a hlân.

Mobile ATM van
Mizoram Cooperative Apex Bank (MCAB) mobile ATM van thar chu nimin khan Lunglei Venglaia MCAB pisa aṭangin Cooperation minister C Lalrinsanga’n a vailiam. Mobile ATM van hi Financial Inclusion tihhlawhtlin a nih theihna tura NABARD Financial Inclusion Fund (FIF) kaltlanga ruahman a ni a, bank leh ATM awm lohna hmuna mite'n ATM hmanga bank an chhawr theihna tura MCAB leh NABARD thawhhona a ni.

Chawlh sawn
GAD chuan notification ti chhuakin, Ministry of Personnel, Public Grievances & Pension thu angin Muharram anih avanga ni 19.8.2021 sorkar chawlha puan chu ni 20.8.2021 ah sawn a nih thu an tarlang.

CCC ṭanpuina pe
Minister C Lalrinsanga chuan nimin khan Baptist Church of Mizoram buatsaih Baptist Covid Care Centre, Serkawn a tlawh a, oxgen concentrator leh Rs. 20,000 a pe. Baptist CCC hi July 28, 2021-a din niin, July 30-a hman ṭan a ni.

Minister-in enfiah
Tourism minister Robert Romawia Royte chuan nimin khan Lawngtlai Tourist Lodge bula Community Centre sakna tur hmun a tlawh a, hmalak zui zel dan tur a enfiah. Lawngtlai Community Centre sak nan hian cheng nuai 236 ruahman a ni a, first instalment pek chhuah tawh a nih thu sorkar thuchhuah chuan a tarlang.