"Agriculture kaihhnawihah 7% dah a nih laiin Civil Aviation-ah 13%" : Thua mipui hrâi tum lo turin CM ngen

ZPM Ṭhalai chuan nimin khan thuchhuah siamin, chief minister Zoramthanga chu thu ringawta mipui hrâi puar tum lo turin an ngen.

ZPM ṭhalaite chuan, kum 2018 inthlanpui dawnah MNF president Zoramthanga'n an sorkar hunah vai buhfai ei a ngaih tawh loh tur thu sawia mipui a tiam thu leh sorkarna an lak hnuah pawh ei leh bara intodelhna tura nasa taka ke pên tum a nih thu a sawi ṭhin tih an tarlang a, "Pu Zoramthanga kaihhruai MNF sorkarin, ei leh bara intodelhna kawnga a pheichheh muan dan en hian, thu ringawt hmanga min hrai puar a tum niin a lang," an ti.

Independence Day 2021 lawmnaah CM Zoramthanga'n, a sorkarin PMKSY scheme hmanga leilet an tuai tharah buh kg. 18,00,000 thar a nih tur thu a sawi tih tarlangin ZPM Ṭhalai chuan, "Mizoramin kum khata buhfai a mamawh zat Supply Minister-in a sawi chu kg. 1,10,00,000 a ni. PMKSY aṭanga buh an thar zat tur a sawi hi lo thar tak tak pawh ni se, Mizoram mamawh a phak lohna chu kg. 92,00,000 a ni," an ti a; CM chu ei leh bâra intodelh tura a intiamnaah a din lohzia a nemnghet zawk niin an sawi.

ZPM ṭhalaite chuan, "I-Day-a CM thusawiin a tarlan dânin, SEDP aṭanga allocation hrang hrangah Agriculture and allied sector tan 7% chauh ruahman a nih laiin, Civil Aviation tan 13% lai ruahman a ni leh lawi si. Sorkar hian airport cute ber nei tura nasa taka a bei ang hian ei leh bàra intodelh tur hian a bei ve thei lo em ni?" an ti.