Champhai-Zokhawthar kawng laiha lungawi lohna chinfel dan ngaihtuah

Champhai-Zo­khawthar World Bank Road laih chungchanga lungawi lohna thlente ngaihtuahtu Grievances Redressal Committee (GRC) chu nimin khan an chairman Maria CT Zuali, Champhai bawrhsap hoin DC conference hall-ah an ṭhukhawm a, lungawi lohna chinfel dan tur an ngaihtuah.

Maria CT Zuali chuan, kawng laihin harsatna a thlente leh lungawi lohna lutte ngaihtuah hunah inremna leh lungawina a awm theih nan inbiakna tluang tak neih a ṭul thu a sawi a, "Hmasawnna hnathawh ṭhenkhatin chhiatna thlen cháng awm ṭhin mah se, hna thawktu company, a tuartute leh sorkar thuneitute'n chinfel dan ngaihtuahin dan angin lungrual takin hma an la tlang ṭhin tur a ni," a ti.

Special land acquisi­tion officer V Lalruatliana chuan, kawng laih dawnah zangnadawmna pek nan ram lâk tur chinte zir chian ṭhin a nih thu sawiin, "Leivûng paihna turte pawh uluk taka ngaihtuah tel ṭhin a ni," a ti.

PWD AE Hming­thanmawia chuan, World Bank project duh dan angin kawng laih leivungin huan leh thlai a tihbuai loh nan felfai taka paih tura hmalak ṭhin a nih thu a sawi a, "Champhai-Zokhawthar World Bank road laih nan hmun pangaah PIU-in leivûng paihna tur a ruat a ni a, ram neitu leh contractor-te an inbe rem thei. PIU-in a pawm chin leivûng paihna baka contractor-in a paih avanga harsatna awmte chu ram neitu leh contractor inkar a ni a, leivûng paih vanga complaint tam zawkte chu hetiang hi a ni," a ti.

Ṭhutkhawmah hian kawng laih vanga harsatna tuarte aṭanga lungawi lohna Champhai DC office-a thehluh 26 leh PIU-a thehluh pakhat chungchang ngaihtuah a ni a; lungawi lohna thlente chu mimal hmingin 19, VC hmingin panga, kohhran pakhat, cooperative society pakhat leh NGO aṭangin pakhat a ni.