Covid-19 vei mi pathum thih belh; mi 187 an thi tawh

Nimin khan Covid-19 hripui vangin Mizoramah mi pathum an thi a; sorkar chhinchhiah angin, hripui vanga thi chu mi 184 an tling tawh.

Lawngtlai District Hospital (dedicated covid health centre)-a Covid-19 vei enkawl lai J Lalpari (85) w/o K Lalsiamliana, Sihtlangpui, Lawngtlai district chu nimin zing dar 4:20 khan a thi a, nimin khan an khuaah vui a ni.

Lawngtlai MJA president Lalngheta Ralte hnen aṭanga thu dawn danin, J Lalpari hi natna benvawn nei sa a ni a, Covid-19 positive a ni tih August 9 khan hmuh chhuah niin District Hospital-ah enkawl nghal a ni.

Nimin zing dar 7:40 khan Valkhawliana (78) h/o Chalruali, Falkland Veng, Aizawl chu hripui vangin State Referral Hospital-ah a thi a, nimin khan vui a ni. Covid-19 positive a ni tih July 20, 2021 khan hmuh chhuah a ni a, SRH-ZMC-ah admit nghal a nih thu sorkar thuchhuakin a tarlang. Falkland Veng LTF hruaitute chuan, Valkhawliana hi pa hrisel ṭha pangngai tak a nih thu leh natna dang a neih an hriat loh thu an sawi.

ZMC-a hripui vei enkawl lai Malsawm-tluanga (63) h/o Zosang-puii, Nursery Veng, Aizawl pawh nimin chawhnu dar 1:20 khan a thi a, nimin tlai dar 5 khan Salvation Army Gilgal Corps hall-ah vui a ni. Amah hi Covid-19 vei a ni tih July 31, 2021 khan hmuh chhuah niin, August 3 aṭangin SRH-ah enkawl a nih thu sorkar thuchhuakin a tarlang.

Malsawmtluanga hi Aizawl City Bus Owners Association president ni lai a ni a; zunthlum nei sa leh Covid-19 vaccine la kim tawh a nih thu a chhungte chuan an sawi.