Covid-19 vei mi 12 hmuh belh Mizoramah Covid-19 vei 33 awm mek
June 5, Zirtawpni zan leh June 6, Inrinni zan khan Mizoramah Covid-19 hripui vei mi 12 hmuh chhuah belh a ni a, anni nen hian Mizoramah Covid-19 vei mek mi 33 an awm.
June 5, 2020 zanah Covid-19 vei mi pahnih hmuh chhuah a ni a; an pahnih hian Aizawl district-a mi ve ve, mipa leh hmeichhia niin, Delhi aṭanga rawn haw ve ve an ni.
Pakhat chu quarantine centre-a awm lai a ni a, pakhat zawk erawh chu home quarantine-a awm lai a ni thung. An pahnihin Zoram Medical College (ZMC)-ah dah nghal an ni.
Inrinni zan khan Covid-19 vei mi 10 hmuh chhuah leh an ni a; Mamit district-a mi pasarih, Lawngtlai district-a mi pahnih leh Aizawl district-a mi pakhat an ni. An zinga pasarih chu mipa niin, hmeichhia pathum an awm a, an district
ṭheuha Covid-19 veite enkawlna hmunah an awm zui mek.
Lawngtlai district-a Covid-19 vei hmuh chhuahte chu Lawngtlai khawpuia quarantine centre-a awm an ni a, Mamit district-a mite chu West Phaileng quarantine centre-a awm niin, Mamitah lak an ni tawh. Aizawl district-a mi hmuh chhuah thar chu Aizawla quarantine lai a ni.
ZMC aṭanga thu dawn danin, Covid-19 vei hmuh chhuahte chu Aizawl district mi an nih loh a, dam lohna an nei a nih loh chuan (symptom a lan loh chuan) ZMC-ah an hruai vek lo a, an district-a Covid-19 Care Centre-ah enkawl tura tih an ni. Covid-19 kai thar zingah ngaihtuahawm an awm lo.
June 1, 2020 aṭanga Mizorama Covid-19 vei mi hmuh chhuah tawh mi 33 zingah hian Kolkata aṭanga lo haw mi pahnih leh Gujarat aṭanga lo haw mi pakhat tih loh chu Delhi aṭanga lo haw vek an ni.
Covid-19 vei zat
District Vei zat
Aizawl 9
Lunglei 2
Kolasib 11
Lawngtlai 2
Mamit 8
Saitual 1