COVID-19: Mizoram dinhmun : Hripui vei 249 hmuh belh a ni

August 15, Pathianni khan Mizoramah Covid-19 vei 249 hmuh chhuah a ni a, kumin July 11 hnua hmuh chhuah tlem ber ní a ni. Nimin khan hripui laka fihlim tawh mi 523 chhuahtir an ni a, hripui vangin mi pathum an thi.

Covid-19 vei hmuh tharte chu mipa 121 leh hmeichhia 128 an ni a; Rapid Antigen Test hamnga hmuh chhuah 229 leh Fluorescent Immunoassay (FIA) hmanga hmuh chhuah 20 an ni. ZMC laboratory-ah swab sample endik a ni lo a, TrueNAT-PCR hmangin Siahaah sample pakua chiah endik a ni bawk.

TrueNAT hmanga sample endik mi pakuate an negative vek laiin, FIA hmanga endik mi 20-te an positive vek thung. Hripui vei hmuh thar mi 467-te chu symptom nei 190 leh nei lo 59 an ni a; tualchhunga kái vek niin, kàina chin hriat loh mi 147 an awm. IDSP record angin, Mizoramah Covid-19 vei 48,711 hmuh chhuah a ni tawh a, mipa 25,269 leh hmeichhia 23,442 an ni. Nimin tlai dar 5 thleng khan mi 39,216 (80.51%) chhuahtir an ni tawh a, mi 184 (0.38%) thi tawhin, enkawl mek mi 9,311 (19.11%) an awm.

August 15, Pathiannia sample endik dan chu - TrueNAT hmangin Saitual district-ah pakua, RAT hmangin district 11-ah 1,229 leh FIA hmangin Aizawlah 20 a ni a, a vaiin sample 1,258 niin, chu'ng aṭanga hripui vei hmuh chhuah 249 chu 19.79% a tling. Positive percentage hi TrueNAT-ah 0.00, RAT-ah 18.63 leh FIA-ah 100% a ni.
District hrang hranga hripui vei hmuh chhuah dan chu - Aizawlah 193, Siahaah 16, Lawngtlaiah 15, Mamitah pariat, Serchhipah panga leh, Lunglei, Champhai, Kolasib leh Hnahthialah pathum ṭheuh a ni.

Hripui vei hmuh chhuah thar mi 249 zingah naupang kum tling lo 70 chuang awmin, chu'ng zinga mi 50 velin symptom an nei a, nausen kum khat tling lo an awm lo. Kum 60 chung lam 27 aia tlem lo awmin, a upa ber chu kum 84 a ni a, an zingah symptom nei mi 20 vel an awm. August thlaa ni 15 chhungin Mizoramah Covid-19 vei mi 9,787 hmuh chhuah a ni tawh a, chawhrualin ni tin mi 652.47 hmuh chhuah an awm ang a ni. Mizorama Covid-19 vei hmuh tawh zat 48,711 chu kum 2011 chhiarpui angin, Mizorama mi 1,000 zelah hripui vei mi 44 an awm ang a tling.

Nimin khan tlai dar 5 thlengin hripui laka fihlim tawh mi 523 chhuahtir an ni a; Aizawl district-ah mi 303, Kolasib district-ah 99, Mamit district-ah 79, Champhai district-ah 26 leh Lawngtlai district-ah mi 16 chhuahtir an ni. Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 11,925 hmuh chhuah a ni tawh a, TrueNAT-PCR hmangin 2,847, RAT hmangin 33,905, FIA hmangin 33 leh Guwahati-ah pakhat hmuh chhuah a ni tawh.

IDSP tarlan danin, August 15, 2021 thlengin Mizoramah swab sample 7,35,028 endik a ni tawh a, chu'ng aṭanga Covid-19 vei hmuh tawh zat 48,711 chu 6.63% a ni. Hripui vei hmuh tawh zinga mi 44,439 chu Mizoram chhunga kái chhâwng an ni a, mi 4,272 chu Mizoram páwn aṭanga an rawn luh hnua hmuh chhuah an ni.